Thursday , November 23 2017
Home / Sosial & Politika / Gregóriu Saldanha: Loriku Asuwa’in Sai Nudar Simbolu Unidade Nasional
Premeiru Minsitru, Dr. Marí Alkatiri, Prezidente da Republika, Dr. Francisco Guterres Lú Olo no Prezidente Comite 12 de Novembru Gregório Saldanha iha Kongrese Comite 12 Novembru iha CCD.[Foto: Zevonia Vieira | TAFARA.TL | 07.11.2017]

Gregóriu Saldanha: Loriku Asuwa’in Sai Nudar Simbolu Unidade Nasional

“Comite 12 Novembru sente orgulhu, tanba sovrevivente sira ne’ebe namkari iha partidu oin-oin no oras ne’e sira moris ho harmonia. Grupu Loriku Asuwa’in merese hetan parabens tanba sira sai nudar simbolu unidade nasional”. Gregório Saldanha

Comite 12 de Novembru halao kongresu ba dala rua ho objetivu atu afirma fali comite 12 Novembru nian estrutura, no nudar instituisaun apartidaria no revitaliza nia strutura no programa sira nudar kontinuasaun ba povu Timor-Leste no dezenvolvimentu nasional.

Prezidente Comite de 12 Novembru, Gregório Saldanha iha deskursu iha abertura kongresu, iha Centro Convensaun Dili, 7/11 hateten katak liu hosi kongresu ida ne’e afirma fila fali comite 12 de Novembru nia strutura no nudar instituisaun apartidaria.

“Objetivu hosi kongresu ne’e mos hare ba situasaun familia sovrevivente no sovrivente sira rasik nia kondisaun real ne’ebe akontese dadauk. Tanba ne’e ami hare katak presiza harii uma boot ida, hodi halibur sira hotu, no la hare ba diferensia politika. Uma boot ne’e sai nudar imprasial ka apartidaria nudar simbolu unidade nasional ne’ebe nia ema sira namkari iha partidu politiku sira, uma boot ne’ebe bolu comite 12 de Novembru”, hateten Gregório.

Gregório Saldanha afirma katak comite 12 de Novembru lori nafatin karateristiku unidade nasional, ne’ebe uluk comite 12 de Novembru Asuwa’in kaer metin no haklaken nafatin hosi tempu rezistensia to oras ne’e.

“Comite 12 Novembru sente orgulhu, tanba sovrevivente sira ne’ebe namkari iha partidu oin-oin no oras ne’e sira moris ho harmonia. Grupu Loriku Asuwa’in merese hetan parabens tanba sira sai nudar simbolu unidade nasional. Husu ba maluk 12 Novembru sira atu hakas an no kontribui nafatin ba ita nia estadu, hahu no haboot ho kualidade liu hosi servisu ne’ebe halo. 12 Novembru labele sai deit fatin ida atu trata ita nia dokumentus atu simu medalha, osan ka direitus sira seluk maibe comite mos fatin atu halibur malu no fo ita nia kontribuisaun hodi hametin pas no estabilidade no obrigasaun ba ita nia povu nian diak”, tenik Gregório.

Iha parte hanesan Prezidente da Republika, Dr. Francisco Guterres Lú Olo, ne’ebe mak halo abertura iha ba kongresu loron premeiru, iha deskursu hateten katak eventu ida ne’e halibur lideransa rai ida ne’e nian no joven sira hosi Timor-Lesre tomak. Tanba eventu ida ne’e halibur jerasaun tuan no foun.

“Hau hakarak fo hanoin uluk aspetu importante ida, iha ita nia luta libertasaun nasional. Hotu-hotu ne’ebe partisipa iha luta libertasaun nasional hatene sa difikuldade mak ita hasoru durante tinan 24 nia alran. Ita hotu hatene mos katak ita konsege hakat difikuldade hotu tanba ita nia espiritu nasionalista, ita nia determinasaun, ita nia branu, ita nia domin ba nasaun no povu ida ne’e. Iha tempu luta, ita laiha Konstituisaun no Leis ne’ebe ita iha ohin loron. Iha tempu ne;eba, ita buka malu, koalia ba malu no tau ita nia matenek hamutuk, atu buka hetan solusaun ba problema ne’ebe mosu iha faze luta idak-idak no sirkunstansia luta idak-idak”, esplika Lú Olo.

Lú Olo hatutan katak espiritu nasionalista, domin ba povu Timor no ba nasaun mak lori joven sira la tauk see-an ba mate iha loron sakrifisiu 12 Novembru 1991, iha luron Dili nian no iha rate Santa Cruz.

Eiz Komandante Falintil ne’e mos afirma katak biar konsekuensia todan tebes ba familia sira, ba povu no ba Estadu Timor-Leste, masakre Dili halo povu nia luta avansa liutan, tanba hosi loron ne’e ba oin, mak komunidade internasional fo liutan atensaun ba povu maubere nia luta libertasaun nasional.

Premeiru Ministru ne’ebe partisipa iha kongresu refere hatoo mos nia hanoin katak, 12 Novembru ne’e sakrifisiu boot ida, iha tinan 16 ba kotuk ne’ebe joven sira halo, sira hatene katak perigu ne’e boot tebes, maibe sira halo duni sakrifisiu ne’e, tanba ne’e ohin loron Timor iha paz no estabilidade.

“Joven 12 Novembru sira uluk hatudu mai ita, bainhira ita halo sakrifisiu, ita sakrifisiu hamutuk, bainhira tenke hamutuk, ita tenke hamutuk. Dalan ne’ebe ita boot sira hatudu mai ami, biar ami mak hahu prosesu ida ne’e, dalan ne’ebe imi hatudu mai ami, ami koko atu aprende dalan ne’ebe imi hatudu mai ami”, hateten Marí Alkatiri.

Hosi kongresu ida ne’e Prezidente Comite 12 de Novembru ezizi ba governu atu foti desizaun klaru ba monumentu memorial masakre Santa Cruz tanba prosesu tomak comite prepara ona. Husu ba VII Governu Konstituisional pro ativu atu husu ba governu Jakarta, hodi hatudu fatin ne’ebe military Indonesia sira subar Aswa’in sira nia mate isin, husu hodi hatudu saudozo Nicolau Lobato nia mate isin.

Comite 12 de Novembru mos apoia tomak ba Prezidente da Republika hodi konvoka reuniaun politiku nain sira, hodi buka solusaun ba rai Timor, tanba tur hamutuk no koalia ba malu mak bele resolve problema ne’ebe akontese.

Kongresu ba loron dahuluk partisipa hosi Premeiru Minsitru, Dr. Marí Alkatiri, membru governu sira, korpu diplomatiku, Komanda Jeral FFDTLm Lere Anan Timur, membru Parlamentu Nasional, sosiadade sivil no kongresista sira.*[Zevonia Vieira | TAFARA.TL | 07.11.2017]

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Teresa: Pasiente Ida Sae Kama, Dotor Sira La Atende Tanba Governu Sedauk Selu

“Surat kami bulan lalu tanggal 11 Agustus 2017, bahwa balance payment sampai Agustus 2017 sebesar …

One comment

  1. Viva Jovetude Lorico Aswain

Leave a Reply

Your email address will not be published. Required fields are marked *