Thursday , November 23 2017
Home / Sosial & Politika / KOMUNIDADE SUKU LELALAI SUSAR ASESU BA BEE MOS NO MERKADU
Estudante Estajiadus FCS-UNTL foto hamutuk ho Komunidade Aldeia Desa, Suku Lelalai, Postu Administrativu Quelecai, Municipiu Baucau, hafoin halo levantamentu ba dadus uma kain no identifika problemas mak komunidade enfrenta. [Foto: Martinho Moniz | TAFARA.TL | 16.10.2017].

KOMUNIDADE SUKU LELALAI SUSAR ASESU BA BEE MOS NO MERKADU

Asesuidade ba estrada diak, bee moos no eletrisidade mak nu’udar esperansa povu nian iha era independensia. Maibe Komunidade Suku Lelalai, Postu Administrativu Quelecai nafatin halerik ba bee mos no estrada ne’ebe bele fasilita sira hodi sustenta sira nia vida.

Membru Komunidade Aldeia Desa, Suku Lelalai Postu Administrativu Queleccai,  Aguida da Cruz, ba TAFARA.TL hateten, “ami iha ne’e ami nia dfikuldade maka ami lori ami nia nu, kamí, ba merkadu mos do’ok tamba estrada ladiak, be’e moos mos dok, nune’e ami nia-oan sira ba eskola tarde tamba ba kuru be’e dok.”

Iha sorin seluk, Lorenço Sarmento, nu’udar mos membru komunidade Aldeia Desa hateten, “hau kuda batar, ai-farina, ami nia sasan sira ami kuda ne’e folin laiha tamba atu lori ba merkadu mos dok.” Maske estrada at, merkadu dok, komunidade sira nafatin ba fa’an ai-fuan sira ne’e hodi hetan osan nune’e bele selu oan sira nia eskola maske to’o deit nivel sekundaria.

Komunidade sira nafatin husu ba estadu oinsa bele hasai sira husi situasaun refere, ba TAFARA.TL, Agida da Cruz hateten, maske governu troka ba troka maibe povu nia moris mak nune’e hela deit. Nune’e membru komunidade ne’e husu ba estadu atu hadia netik sira nia estrada no dada be’e mos, lian hanesan dehan mos husi Lorenço Sarmento.

Entretantu Xefe-Suku Lelalai, Salomão Fraga Fernandes afirma, “difikuldade ne’ebe mak hau nia komunidade hasoru mak estrada no bee moos, durante tinan sanulu-resin hahu Timor ukun-an mai to’o agora, komunidade aldeia hat susar tebes atu asessu ba estrada, komunidade sempre susar ba bee liu-liu iha tempo bai-loron.”

Autoriedade Suku ne’e esplika iha tempo udan bee besik uitoan tamba bele aproveita udan been, bele aproveita bee lihun ne’ebe mak besik komunidade nia uma, maibé la permanente. Iha tempo bai-loro komunidade Suku Lelalai liliu Aldeia Osuleru, Dauaduka no Desa susar tebes ba bee. Komunidade sira ba kuru bee iha mota laran ne’ebe ho distansia kuaze kilometru rua resin. Bee ne’ebe kuru atu lori ba hemu, atu haris labele tamba bee laiha.

Lider Komunitaria ne’e hateten, “ami nia inan-aman sira semana ida haris dala ida, dalaruma semana ida la haris tamba bee laiha, ne’e implika ba inan isin rua, bebe sira nia saude. Estudante sira ba haris do’ok dala ruma sira ba eskola tarde, dala ruma la ba eskola tamba bee laiha, tenik Salomão Fraga Fernandes” .

Nune’e Xefe Suku ne’e hamutuk ho nia estrutura Konsellu Suku tomak halo esforsu hodi kordena ho autoriedades relevantes oinsa bele resolve problemas sira ne’ebe mak komunidade refere infrenta.

Iha fulan Juñu 2017 liu ba, Ministeriu Obras Publika liu husi Institutu Gestaun Ekipamentus loke luan uitoan Estrada husi suku Laisorulai de Baixo to’o iha Suku Lelalai maibe kondisaun Estrada la 100% diak, bainhira udan kareta sira mos labele liu, movimentu susar tamba tahu.

Salomão Fraga Fernandes mos hateten, “durante ne’e ami hare katak Governu susar atu bele rona ami nia halerik, ami nia susar, atu konsidera ami nia pedidu sira ne’ebe mak ami hato ona.” Nune’e Autoriedade ne’e optimista no iha korajem nafatin atu esforsu nafatin hodi Suku refere hanesan mos Suku sira seluk.

“Iha tinan ida ne’e, ami halo ona pedido ba Munisipiu, halo ona depaxu tun mai katak sira konsidera ona ami nia planu, ami nia proposta ne’e maibe to’o ohin loron seidauk iha informasaun serteja ida katak sira bele aprova ami nia proposta ida ne’e, maibe ami ho komunidade tomak halo esforsu nafatin para bele lori be’e mos mai ami no halo ami nia Estrada ida ne’e,” tenik Xefe Suku Lelalai.

Nune’e Lider Lokal ne’e husu komunidade, atu servisu hamtuuk, apoia malu, kaer metin prnsipiu unidade hodi dezemvolve suku Lelalai hanesa mos suku seluk, ne’ebe maka asesu ba estrada diak no bee mos. *[Martinho Moniz | Estajiadu Dep.CS, UNTL | TAFARA.TL | Editor: Ato ‘Lekinawa’ Costa | 17.10.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Komunidade Unidade VI Quelecai Relembra Masakre Santa Cruz 12 Novembru

Loron 12 fulan Novembro 1991 loron nakukun ba Juventude Timor-Leste, iha ne’ebe Jovens barak fakarak …

Leave a Reply

Your email address will not be published. Required fields are marked *