Thursday , November 23 2017
Home / Sosial & Politika / Komunidade Unidade VI Quelecai Relembra Masakre Santa Cruz 12 Novembru
Chefi Suku Lelalai hato'o hela liafuan ida rua ba komunidade sira.[Foto: Matinho Moniz].

Komunidade Unidade VI Quelecai Relembra Masakre Santa Cruz 12 Novembru

Loron 12 fulan Novembro 1991 loron nakukun ba Juventude Timor-Leste, iha ne’ebe Jovens barak fakarak ran, lakon vida iha Semiteriu Santa Kruz, Dili, tamba bala musan invazor Indonezia nian, hodi hamosu Masakre boot iha Timor-Leste.

Iha era independensia, loron ne’e estadu Timor-Leste deside nu’udar loron Nasional Foinsa’e nian no Masakre Santa Kruz. Nune’e iha selebrasaun tinan 15 loron nasional Juventude no tinan 26 Masakre Santa Kruz, ohin loron 11/11/2017 Autoriedade lokais, komunidade, Estudante sira no Estajiadus UNTL iha Quelecai hamutuk ba iha Baze Apoiu Saukolu foho Matebian hodi marxa ba Osuariu Provizoriu Sentru Dubuai, Quelecai.

Ofisial Dezenvolvimentu Postu Administrativu Quelecai, João Bosco Ximenes “Maulesa” ba TAFARA.TL iha baze apoiu Saukolu hateten selebrasaun ida ne’e fo honra ba matebian sira iha masakre 12 Novembru 1991, iha Santa Kruz Dili. Estajiadus sira ne’ebe estajiu iha Quelecai, Alunus Sekundaria, 3o Seculo ho komunidade sira, Policia, Seguransa, Veteranus, profesores, funsionariu Saude, Edukasaun, mai iha fatin ida ne’e hodi lembra fila fali saudozu sira nia sakrifisiu, ne’ebe mate ba rai ida ne’e ba hetan independensia, ohin loron ita nia nasaun Republika Demokratika Timor-Leste.

Maulesa konta istoria kona ba fatin historiku refere katak, Saukolu nu’udar fatin historiku, ne’ebé bolu dehan baze Apoiu, signifika fatin ba organiza funu, organiza forsa FALENTIL, organiza sivil politika sira, organzia Povu, organiza politika estadu kontra invazor Indonezia, halo servisu Agrikultura ninian, hanorin ema, servisu saude oinsa kura forsa FALENTIL sira iha fatn refere.

Ho ida ne’e João Bosco Ximenes “Maulesa” husu ba Joven sira tenki neon na’in, matan moris, estuda, buka matenek, fahe matenek no servi ho matenek. Reprezentante Administrador ne’e husu ba Foinsa’e no Estudante sira atu buka hatene historia funu, fatin rezistensia, maneira organiza funu, atu hetan libertasaun nian, hodi fahe no hakerek historia ne’ebe loos, justu no korretu.

Nia husu ba Juventude Timor-Leste liu liu edukasaun, atu kontinua lembra nafatin historia Timor-Leste ne’ebe nakonu ho sakrifisiu, fakar ran, ruin namkari, barak lakon aman, Inan, familia tomak. Tamba ne’e Juventude Timor-Leste tenki partisipa ativu no fo valor ba loron historiku sira hanesan 12 de Novembro, 28 de Novembro, 30 de Augustu no loron boot sira seluk, hakribi hahalok at sira, hanesan oho malu, asalta malu, odi malu, maibe buka atu hadomi malu, unidade atu hodi Timor ba Oin.

Iha sorin seluk Prezidente Komisaun Organizadora Rekolla Restus Mortais Sentru Dubuai, hanesan mos Veteranus Pedro da Costa Cabral, ba TAFARA.TL haktuir katak uluk hanesan mos joven, kaer kilat durante tinan ida, iha baze apoio ida ne’e.

“Juventude balun 16, 17, 25 Anos halibur hamutuk kaer kilat no konsentra iha fatin ida ne’e, iha komapaña hitu. Ministru Edukasaun, Agrukultura no Saude naran Vicente Reis ‘Sahe’, esklarese katak ita nia funu sei naruk, ita nia funu sei boot, maibe ita sei manan ita nia funu. Mais wainhira funu hotu, ita manan ita sei hamutuk. Iha loron 30 fulan Augostu 1999, ita hamutuk hodi liberta ita nia nasaun no povu ida ne’e. Nune’e sira mate, sira husik hela mai ita, ita aproveita, ita lembra nafatin sira nia sakrifisiu ba nasaun ida ne’e, ba Povu ida ne’e.  Mensajem ba Juventude Agora mak hatutan historia hodi liberta Povu”, tenik Pedro da Costa

Entretantu estudante estajiada UNTL, Sonia Claret ba TAFARA.TL hateten ho selebrasaun loron historiku ohin, ho honestidade Sonia labele expresa ho liafuan maibe orgullu tan bele hola parte iha selebrasaun refere, liu husi marxa ne’e bele sente saida mak akontese iha tempu ne’eba. Loron ida ne’e importante tebes ba joven foinsa’e sira atu partisipa, hodi hanoin hikas fali herois sira nia luta, ne’ebe fo aan tomak ba Timor ninia destinu.

Antes hahu marxa autoriedades lokais, reprezentante veternaus, foinsa’e no estudante sira hato’o intervensaun, sunu lilin. Partisipa husi Komunidade, estudantes no foinsa’e kuaze ema 800, kontinua kedas ho marxa paz husi Baze Apoiu Saukolu Kuaze Kilometru 30,  husi foho matebian hun mai iha Osuariu Provizoriu Sentru Dubuia.

Ho antuziasmu lori Bandeira Republika, Falentil no Fretilin, kaer ho hena espanduk hakerek, Sira nia mate mak Ami nia liberdade, Juventude 12 de Novembru mak modelu ba joven sira seluk, espiritu 12 Novembru prezerva espiritu nasionalismu no patriotismu iha Timor-Leste, nu’udar lian espresaun foinsa’e no estudantes sira nian iha selebrasaun ne’e. Marxa paz ne’e akompaña direita husi mediku no PNTL Quelecai.* [Martinho Moniz | Estudante Estajiadu Dep.CS,UNTL | TAFARA.TL | Editor: Zevonia Vieira| 11.11.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Tinan Ida La asesu Merenda Escolar, Bee Moos no Nesesidade Saneamentu Baziku Laiha

“Merenda eskolar tinan ida ne’e mak la la’o, tinan hira ba kotuk ne’e la’o diak …

Leave a Reply

Your email address will not be published. Required fields are marked *