Friday , November 24 2017
Home / Sosial & Politika / Lú Olo: Rikusoin Ne’ebé Ita Nia Juventude Hetan ho Povu Nia Maka Paz no Independensia
Prezidente Republika, Dr. Francisco Guterres Lu Olo ho nia espoza hamutuk ho Primeiru Ministru, Dr. Mari Alkatiri, membru governu, membru parlamentu no corpo diplomata iha selebrasaun loron 12 de Novembro 2017. [Foto: Maria do Ceu | TAFARA.TL | 12.11.2017].

Lú Olo: Rikusoin Ne’ebé Ita Nia Juventude Hetan ho Povu Nia Maka Paz no Independensia

“Rikusoin ne’ebé ita nia juventude hetan ho povu nia vitoria maka paz no independensia, ne’ebé hetan tiha ona. Murak boot liu ne’ebé independensia lori ba jerasaun foun sira maka respeita ba dignidade timor hotu-hotu nian inklui ba foinsa’e sira hodi dezenvolve nasaun no garante ita nia povu nia moris di’ak.”

Iha komemorasaun loron masakre Santa Cruz 12 de Novembro ho tema ‘Fanun ita hotu atu halo nafatin sacrefiçio iha luta foun ba Timor-Leste nia moris dia’k’.  Iha tinan ida ne’e, iha fatin akontesementu Santa Cruz, ne’ebe Juventude Loriko Asuwa’in sira hamutuk hodi komemora, Prezidente da Republika, Dr. Francisco Guterres Lú Olo iha deskursu hatoo sentidu kondolensia ba familia  sira ne’ebe sei laran taridu, tanba lakon sira nia oan iha prosesu luta hodi tane as povu nia dignidade no Timor nia Independensia. laos deit iha Santa Cruz maibe iha fatin sira seluk.

Lú Olo esplika katak riku soin ne’ebé juventude hetan ho povu nia vitoria maka paz no independensia ne’ebé hetan tiha ona. Murak boot liu ne’ebé independensia lori ba jerasaun foun sira maka respeita ba dignidade Timor hotu-hotu nian, inklui ba foinsa’e sira, hodi dezenvolve nasaun no garante povu nia moris di’ak.

Iha fatin hanesan, Prezidente Comminte 12 Novembru, Gregório Saldanha afirma katak Sakrifisiu boot, determinasaun boot ne’ebé mak joven sira hatudu, tenki sai hanesan inspirasaun ba ita hotu, ne’ebé mak moris.

“Ita hotu ne’ebé mak sai hanesan sobreviventes, povu tomak sobreviventes la’os de’it iha Santa Cruz. Tanba funu ne’ebé naruk halo ita sai sobreviventes, ita hotu mate restus, ita tenki inspiradu husi hahalok de coragem ho determinasaun joven sira, hatudu atu ohin ita bele hamutuk nafatin kontribui ba dezenvolvimentu nasionál”, esplika Gregório.

Wainhira jornalista TAFARA.TL dadalia ho familia matebian, Gaudia Joana Ximenes ne’ebé mak partisipa iha komemorasaun 12 de Novembro 2017 nian, oan feto husi saudozu Tomas Ximenes ‘Belik’ hato’o nia sentimentu triste ho matan we’e sulin, katak familia laran triste, laran moras, fuan ne’e tanis tebes tanba lakon aman, “maibé ami kontenti tanba bele fó nia an tomak luta ba nasaun ida ne’e, maske familia lakon aman, to’o agora ami la hetan ruin, maibé familia nafatin kontenti no apresia ba luta ida ne’e”.

Komemorasaun 12 de Novembro tinan ida ne’e, partisipa hosi Premeiru Ministru, Dr. Marí Alkatiri, membru governu, membru parlamentu, corpo diplomatiku, sovrevivente 12 Novembru, familia vitia 12 Novembru no estudantes sira.

Hodi komemora eventu importante ida ne’e, no parte hosi loron nasional juventude ba  tinan 15, realiza atividade kalan kultura iha munisipiu 12 no rejiaun ida, Juventude sira ne’ebé la’o ain mai Dili, (Juventude husi parte leste konsentra iha munisipi Manatuto hodi la’o ain mai Dili, nune’e mós Juventude husi parte Oeste konsentra iha Munisipiu Liquiçá hodi la’o ain mai Dili e Juventude husi parte central konsentra iha Aileu hosi la’o ain mai Dili.), Misa hamutuk, long march husi Motael ba Santa Cruz no Kari Aifunan.* [Maria do Céu | Editor: Zevonia Vieira | TAFARA.TL | 12.11.2017].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

Atinji Igualdade Jeneru Iha PN no Sosiadade Sivil, GMPTL Kontinua Luta

“Parlamentu fó espasu di’ak ba feto sira iha parlamentu, hodi harii grupu ida hamahan an …

Leave a Reply

Your email address will not be published. Required fields are marked *