Thursday , November 23 2017
Home / Ekonomia & Bisnis / Nivio Magalhães: Zero Toleransia Ba Traballadores Ilegal Iha Rai Liur tamba taka dalan ba Timor-Oan seluk
Foto despedida entre SEJT no Traballadores Timor-Oan sira antes foti ain husi Timor hodi ba servisu iha Korea no Autralia. [Foto: Bebiana Soares | TAFARA.TL | 09/10/2017].

Nivio Magalhães: Zero Toleransia Ba Traballadores Ilegal Iha Rai Liur tamba taka dalan ba Timor-Oan seluk

“Ba oin sei iha zero toleransia ba traballador ne’ebe mak servisu iha rai liur maibe ilegal, tanba sei taka dalan ba Timor oan seluk ne’ebe mak hakarak servisu iha rai liur. Tanba ne’e Timor-Oan ne’ebe diak labele taka dalan ba nia maluk sira seluk, tenki hatene saida mak atu halo no kumpri regras ne’ebe mak iha.”

Deklarasaun ne’e hato’o husi Sekretariu Estadu Juventude no Traballu [SEJT], Nivio Magalhães, iha serimonia despedida ho traballadores Timor-Oan na’in 40 ne’ebe sei ba servisu iha Australia no Korea, ohin 09/10/2017.

Sekretaria Estadu Juventude no Traballu [SEJT] nu’udar orgaun tutelada ba Juventude no empregu iha Timor-Leste. Empregu nu’udar fator determinante ba Ema nia vida prosperiedade, nune’e  estadu Timor-Leste liu husi Sekretaria Estadu Juventude no Traballu esforsu maka’as atu hakbi’it, kapasita foinsa’e sira hodi minimiza dezempregu iha rai laran liu husi programa no politika haruka Timor-oan sira ba servisu iha Nasaun seluk hanesan Korea, Australia no seluk tan.

Ohin 09/10/2017 Sekretaria Estadu Juventude no Traballu [SEJT] despede ho traballador Timor oan na’in 40 kompostu husi feto 20 no mane 20 ba servisu iha Australia no Korea. Husi traballador nain 40 ne’e na’in 35 ba Australia no nain lima ba Korea. Iha serimonia dispidada refere Secretario Estadu Juventude no Trabaillu,  Dr. Nivio Magalhães hateten ba trabailhador sira, atu lori nasaun nia naran, labele halo buat lalos, mantem dixipina atu nune’e ema labele temi Timor oan, no familia sira, kuidadu saude nune’e fila mai ho saude ne’ebe mak di’ak.

“Hau nia mensagen badak de’it, ita boot sira ba iha ema nia rai tau nafatin iha neon katak ba la’os de’it atu buka servisu, atu manan osan, maibe iha ita hotu nia kabas tenki kuidadu didiak ita nia nasaun nia naran. Tanba hahalok saida de’it mak ita halo ema sei la temi naran ida idak maibe ema sei temi Timor oan. Ba sevisu kuidadu imi nia saude, ba servisu haree mos ba seguransa imi nia a’an ida-idak nian, tanba imi ba iha ne’eba husik hela familia iha ne’e, familia sira hein imi la’os de’it fulan fulan imi haruka osan mai maibe, atu loron ida imi fila fali mai hamutuk ho sira,” hatete Nivio Magalhães.

Governante ne’e hatutan, “Ha’u koalia hanesan ne’e la’os atu halo tauk imi maibe, servisu ne’e dala ruma ita dehan todan maibe hau fiar maski servisu ne’e todan maibe se ita servisu ho laran, ita hatene ita ba iha ne’eba atu halo saida, ita iha ne’eba ne’e tanba servisu, fokus ba iha ita nia servisu,” tenik Sekretario Estadu Juventude no Traballu iha nia diskursu.

Secretario Estadu Juventude no Trabaillu,  Dr. Nivio Magalhães husu ba traballadores sira atu hateke ba sira nia inan aman, hanoin ba para atu servisu fila fali mai ho saude di’ak, fila mai ho osan, fila mai ho koñesimentu di’ak para atu dezenvolve ita nia rai, haree ita nia familia laos ba atu pasiar, laos ba atu ransu hodi ba baku malu iha Korea ka Australia, laos halo fali grupu iha ne’eba hodi baku fali ema rai nain, laos ransu malu to dader, lao la kuidadu an depois kareta soke no seluk seluk tan,  ne’e labele iha.

Iha fatin hanesan traballadora Marciana de Jesus Ramos ne’ebe hetan mos okaziaun hodi ba servisu iha Australia,  ba TAFARA.TL Marciana de Jesus Ramos hatete, “hau ba servisu tanba hau hakarak prepara hau nia an ba iha futuru no mos hadia ekonomi familia iha uma laran. Hanesan Joven reprezenta Timor ba iha ne’eba, Hau tenki servisu ho diak hatudu Hau nia dixipina tanba hau lori ita nia bandeira no Nasaun Timor Leste,” dehan Marciana de Jesus Ramos ba TAFARA.TL iha Edificio Sekretaria Estadu Juventude no Traballu, Caicoli, Dili.

Elezito Babo husi Ermera ne’ebehetan mos oportunidade atu ba servisu iha Korea, hateten ba Jornalista sira, “hau ba servisu iha ema nia rai laos lori hau nia interese pesoal maibe lori Nasaun Timor Leste nian naran, buat ne’ebe hau halo iha hau nia esforsu an tinan naruk nia laran, hau fila hau sei halo buat ruma ba hau nia familia no Rai Timor, hau mos sei kumpri regras sira ne’ebe mak hau simu ona iha lei 7 ne’ebe mak tau ona iha deklarasaun, hau sei kumpri atu labele halo sala.”

Traballadores Timor-Oan iha korea hahu husi tinan 2009-2017 servisu iha area prinsipal tolu mak hanesan peska, fabrika no agrikultura. Husi 2009 -2017 traballadores iha area peska hamutuk 1,637, fila ona mai Timor hamutuk 304 feto  laiha. Iha fabrik mane 972 no feto 52, fila ona mai Timor mane 240 no feto 9, no detekta mos ilegal iha 5. Iha area agrikultura husi tinan 2009-2013 mane 50 no Feto iha 73, fila ona mai Timor mane 37, feto 32. Mane ilegal iha 7 feto iha 9. Oras ne’e traballadores Timor-Oan iha Korea  hamutuk 2,784 no sira ne’eb fila ona Timor hamutuk 622. Entretantu traballadores Timor-Oan mak ba Austarlia hahu 2012-2017 iha area rua Hospitalidade no hortikultura. Iha area hospitalidade mane 91 feto 21 no hortikultura mane 480 feto 128 hamutuk 760, sira ne’ebe mak sei iha ne’eba hospitalidade mane 17 feto 25, hotikultura 234 feto 70. Traballadores hirak ne’e mai husi Municipiu 12 inklui Regiaun Espesial Oe-Cusse Ambenu. [Bebiana Soares | TAFARA.TL | Editor Martinho Moniz | 09.10.2017].

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

INDMO Realiza Sertame ba Sentru Formasaun Publiku no Privadu

Institutu Nasional Dezenvolvimentu Mão de Obra (INDMO) loke sertame ba Sentru Formasain Publiku no Privadu. …

Leave a Reply

Your email address will not be published. Required fields are marked *