Thursday , November 23 2017
Home / Sosial & Politika / PM Orgullu, Mortalidade Infantil Tun, Husi 90% Tun Ba Iha 12%
Primeiru Ministro Dr. Rui Maria Araujo, Vice Ministra Ministerio da Saude Ana Isabel Pereira hamutuk ho Parseiru sira loke loron nasional ba saude.[Foto: Zelia Ximenes | TAFARA.TL | 29.07.2017].

PM Orgullu, Mortalidade Infantil Tun, Husi 90% Tun Ba Iha 12%

“Iha tinan 2000 ita harí sistema saude ida husi ahi-tesan nia laran, ohin ita konsege lori malaria ho moras balun ba iha faze eradikasaun, lori mortalidade infantil husi 90% tun ba iha 12%.”

Lia ne’e hato’o husi Primeiru Ministru, Rui Maria de Araujo, iha Selebrasaun Loron Nasional ba Saude iha Timor-Leste, 29 Jullu 2017 fatin Centru Convensaun Dili.

Governu Timor-Leste liu husi Ministeriu Saude selebra Loron Nasional Saude ho tema, ‘lori saude ba uma ka’in idak-idak, lori povu ba moris diak’,iha Centru Konvensaun Dili, 29 Julho 2017, hodi fo inportansia no assesu ba saude hodi hadia kualidade moris timor-oan hotu nian. Koalia ba malu kona-ba asuntu iha area saude nebe afeta ba populasaun, realiza atividade informativas relasiona ho saude, ne’ebe bele promove komportamentus no hahalok moris saudavel ho hanoin ida atu garante populasaun moris diak.

Iha selebrasaun ne’e, Vice-Ministra Ministerio da saude Ana Isabela Pereira afirma; “ohin Ministerio da Saude marka tan historia inportante ida iha Timor-Leste. Liu husi enkontru konselho ministrus iha 31 de janeiru 2017, ne’ebe aprova loron nasional saude Timor-Leste liu husi resolusaun governu No. 6/2017  loron 08 fevereiru, hodi determina loron nasional da saude iha loron 22 de Julho.”

Govenante ne’e esplika, Governu deside loron 22 Jullu 2017 tanba iha loron 22  Jullho tinan 2015, governu liu husi Ministerio da Saude ofisialmente lansa programa saude ba familia ho objetivu atu lori saude ba uma kain idak-idak iha Timor laran tomak, husi professional saude sira.

Vice Ministra mos salienta liu tan katak, iha resolusaun nia laran, Loron Nasional da Saude sei selebra ho realizasaun  atividade ba informativa sira hotu ne’ebe relasiona ho saude, promove komportamentu no abitu ba vida saudavel ho intiutu atu garante buat diak ba populasaun nia moris diak. Garante asesu no kualidade prestasaun saude diak hotu, ba populasaun presiza reforsa infraestutura, kualifikasaun rekursu humanu no espansaun ba servisu.

Loron Nasional Saude sei la intrega iha lista feriadu nasional ka data ofisiais komemorativu ba efetivu sira ne’ebe difini iha Lei No. 10/2015, loron 10 Agustu, altera husi Lei No. 03/2016, loron 25 de Maio, ne’e signifika katak professional saude sira tinan-tinan sei selebra loron inportante ne’e hanesan loron nasional iha Timor-Leste sem feriadu.

Iha fatin hanesan, Primeiru Ministru, Rui Maria de Arauju hateten, Timor-oan sira tenki orgullu ba progresu servisu saude nian iha Timor-Leste.

“Ita hakarak hala’o sussesu no ita mos presiza aponta ba iha insussessu, sussesu lubuk ida nebe ohin ita akompanha ona. Se ita hare ba kotuk iha tinan sanulu resin hitu liu ba, situasaun saude Timor-Leste ninian kompara ho dadus nebe ohin hato husi Ministerio Saude, Timor-oan  tomak, liu liu ba sira ne’ebe servisu iha area saude presiza orgullu. Tanba iha tinan 2000 ita harí Sistema saude ida husi ahi-tesan nia laran no ohin ita bele rona ona dadus balun ne’ebe impresionante, ita konsege lori malaria ba to iha faze eradikada, konsege lori moras balun ba iha faze eradikasaun, ita konsege lori mortalidade infantil husi 90% tun ba iha 12%.”

Chefe Governu ne’e afirma liu tan, iha tinan sanulu resin hitu nian laran ne’e laos kualker país mak halo, Timor-leste konsege halo ida ne’e, tamba ne’e presiza orgullu ba servisu Ministerio Saude nian.

Tafara.org observa selebrasaun loron mundial refere, Ministeriu Saude halo atividade ne’e hahu husi loron 03-29 Jullu. Iha nivel nasional no mos munisipiu halao atividade checkup jeral ba instituisaun publiku husi sira, atividade ekuasaun de saude, selesaun manan nain ba professional saude sira ne’ebe ho dezempeñu ne’ebe diak, kondekora ekipa implementasaun ba saude familia, implementador sangue malaria, kantor musika saude iha ita nia liman rasik, halao mos demostrasaun no kompetisaun tein ba ai-han local iha munisipio, no espozisaun jeral iha Centru Convensaun Dili, ho objetivu atu fo inportansia no assesu ba saude hodi hadika kualidade moris timor oan hotu nian.* [Zelia Ximenes | TAFARA.TL | Editor Martinho Moniz | 29.07.2017].

About Zelia Ximenes

Check Also

Grupu Hadomi Natureza Lao Tuir Ain Fatin Falintil Hosi Ainaro to Dili

Joven sira hatudu sira nian espiritu hodi fo honra ba Falintil sira ne’ebe mak fo …

Leave a Reply

Your email address will not be published. Required fields are marked *