Tuesday , December 12 2017
Home / Sosial & Politika / Teresa: Pasiente Ida Sae Kama, Dotor Sira La Atende Tanba Governu Sedauk Selu
Eis Konsul Jeral Timor-Leste iha Bali, Teresa Maria de Carvalho halo entrevista ho TAFARA.TL [Foto: Lutu Baven | 21.11.2017]

Teresa: Pasiente Ida Sae Kama, Dotor Sira La Atende Tanba Governu Sedauk Selu

“Surat kami bulan lalu tanggal 11 Agustus 2017, bahwa balance payment sampai Agustus 2017 sebesar IDR 102.644.696 dan di tambahkan dengal Bill Invoice September 2017 sebesar IDR 53.760.000, jadi total balances payment yang harus segera di bayarkan sebesar IDR 156.404.696. Kami mohon kepada bapak ibu segera membayarnya karena sudah jauh melawati batas waktu pembayaran yang di tetapkan” Email hosi Hotel Pondok Sari

VII Governu Konstituisional apresenta Karakter urjensia orsamentu retifikativu ne’ebe la pasa iha parlamentu nasional ho razaun la sai hanesan urjensia hodi responde.

Bainhira TAFARA.TL halo entrevista ho Eiz Konsul Jeral Timor-Leste nian iha Bali, Teresa Maria de Carvalho iha nia hela fatin, loron 21/11 hodi esplika kona ba situasaun pasiente Timor oan sira ne’ebe halo tratamentu iha ospital Siloam no Sangla Bali, katak durante Teresa halao nia mandatu hahu hosi Abril 2014 to Jullu 2017, iha numeru pasiente hahu hosi 18 no bele to 25 to iha tinan 2015 nia klaran.

Bainhira hakotu kontratu ho ospital Darmo Surabaya para, pasiente iha Bali bele to 60 no hamosu dividas iha ospital Siloam no Sangla Bali.

“Iha 2015 kuandu ita debate orsamento jeral do estadu 2016, ita iha 5 Milliar ita la selu, entaun bainhira pasiente ida ba sae kama para atu halo kemoteraphy ka atu fase ran, ema la atende. Sira dehan governu sedauk selu entaun ami labele atende. Pasiente sira hotu-hotu shock no tanis, Pasiente ida neebe hau lembra naran mak Brites mais matebian ona, tanba nia moras kankru susun, nia mate tanba stadium akhir ona. depois loron kedas hau buka oportunidade hau ba hasoru maibe ita selu tarde ne’e la afeta ba ita nia pasiente mate, selu tarde ne’e afeta tanba pasiente sira atu fase ran, fase ran imajina ne’e labele tarde tanba kuandu racun sae nia ulun bele mate, ida ne’e laos akontese dala ida maibe bebeik tanba selu tarde hela deit. Asina akordu ne’e entre Direitor Jeral Nasional Guido Valadares maka asina akordu ho sira, entaun pagamento ne’e direitamente ba Ministeriu Saude no Ministeriu Finansas halo pagamentu direitamente ba ospital. Mais kuandu halo pagamentu tarde ami bele hatene, hira mak sedauk selu ne’e ami hatene tanba ospital refere email ba ami”, hateten Teresa

Teresa de Carvalho konfesa ba TAFARA.TL katak durante akompanna debate iha parlamentu, laran triste tanba deputadu sira la sente ba situasaun ne’ebe pasiente sira hasoru iha ospital.

“Ita labele dehan la urjensia, buat balun ne’ebe ita dehan urjensia, ita labele temi deit ospital Siloam ho Sangla. Deputadu sira koalia konaba deit ospital, maibe sira la koalia kona ba pasiente. Ita mos aluga uma ba pasiente tenke selu, kada kuartu Rp.1.700.000, balun Rp. 2.000.000 kada kuartu ne’e ba 24 pesoal plus ema ida hein. Kuandu pasiente to ona 80, ami tenke buka tan guest house. Uma 24 kama ne’e governu selu direitamente maibe guest house ne’e tenke foti osan hosi operasional ne’ebe haruka mai. Osan operasional ne’e selu kondotor hodi tula pasiente hosi hela fatin ba ospital, ospital ba hela fatin. Selu mos guest house par reserva, rumah duka, estende visa pasiente no osan perdiem ba pasien loron ida $10.00 ba ema nain rua $20.00. Hau lembra kuandu bainhira hau request osan operasional fulan 3 $78 mill, ne’e hau mak halo pedidu depende ba numeru pasiente, tanba dalaruma sira nia salario boot tanba sira servisu 24 oras”, esplika Teresa

Hanesa eis deputadu iha uma fukun parlamentu nasional mos esklarese katak Timor-Leste laos provinsia hosi Indonesia, maibe nudar nasaun RDTL tenke iha dignidade, tanba dividas ne’ebe akontese laos dala ida deit, maibe akontese bebeik.

“Jullu to Septembru hau simu email hosi uma nain, hau la hatene selu ona ka sedauk. Uma nain Pondok Hotel Taman Sari, nia hatete katak ita sedauk selu Rp.156.404.696 ne’e hosi Jullu to Septembru. Deputadu sira koalia deit ospital rua, maibe haluha tiha pasiente sira nia kondisaun. Pasiente sira ne’e ema kiak, mai hosi foho, depois governu hanoin mak haruka ba tiha Bali, ita selu tarde, imajina saida mak pasiente ne’e hanoin”. Tenik Teresa.

TAFARA.TL Konsege hetan informasaun hosi email ne’ebe mak manda ba konsuladu Timor-Leste iha Bali hosi otel Pondok Hotel Taman Sari, tuir mai nia esplikasaun iha lian Indonesia.

“Surat kami bulan lalu tanggal 11 Agustus 2017, bahwa balance payment sampai Agustus 2017 sebesar IDR 102.644.696 dan di tambahkan dengal Bill Invoice September 2017 sebesar IDR 53.760.000, jadi total balances payment yang harus segera di bayarkan sebesar IDR 156.404.696. Kami mohon kepada bapak ibu segera membayarnya karena sudah jauh melawati batas waktu pembayaran yang di tetapkan” info email.

Informasaun ne’ebe TAFARA.TL rekolla hosi eis Konsul Jeral katak kustu pasiente bainhira hetan ataka no tama ICU iha Siloam kalan ida selu Rp. 9.000.000. Divida iha Siloam bele to 8 Bilioens ne’ebe sedauk selu. Konsuladu simu karta hosi ospital rua refere katak la simu tan pasiente foun tanba governu sedauk seluk no husu tenke selu ona.

“Ospital Sangla kuandu hakerek karta ba ita, sira dehan ami la simu ona pasiente foun bainhira governu sedauk selu no pasiente ne’ebe iha ne’e hanesan pasiente babain katak se pasiente ne’e ba konsulta karik tenke selu”, hateten Teresa.

Ba TAFARA.TL Teresa De Carvalho mos informa katak tusan ne’ebe iha laos iha ospital deit, maibe iha mate uma (rumah duka. Red) iha Bali. Aluga mate uma ho presu Rp. 11.000.000 inklui kaisaun ho formalin. Iha tinan 2015 sae tiha ba Rp. 20.000.000 maibe konsuladu negosiu tun ba RP. 18.000.000/mate isin.

Ba kargo aviaun antes ho presu $999.000, maibe iha tinan 2016 presu sae ba Rp. 20.000.000, maibe konsuladu konsege halo negosio no tun ba Rp. 18.000.000

“Pasiente ida mate la selu lai to nain lima mate ema komesa haruka karta mai ona dehan tenke selu lai. Hau foti risku hodi uza osan konsuladu nian hodi taka lai tanba hau moe bainhira ema dehan ita nia estadu devedor”, konfesa Tersa.

Iha loron 20/11 Ministro na Presidensia de Conselho de Ministro, Adriano do Nascimento ne’ebe reprezenta proposta iha plenaria ba membru parlamentu sira esplika katak kestaun urjensia orsamentu retifikativu tanba dividas sira kuandu antes taka ano fiscal estadu presiza resolve, se la resolve, la selu mak sei fo impaktu boot, sei hatodan tan ba orsamentu estadu.

“Se la selu estadu tenke selu fali multa, selu ba impresario (multa ne’ebe selu ne’e osan gratis ona). Ida seluk se estadu la selu, impresario sira ne’ebe halo servisu, halo ona obra, ita hatodan sira nia kbiit, tanba sira mos balun deve tutan hosi banku, balun mos uza lai ema nia sasan pois mak atu selu. Kestaun seluk tenke selu tanba kestaun humana ka vida humana. Vice Ministru Saude hateten katak agora dadauk ita atu transfere ita nia ema moras atu ba rai liur, tanba ita nia ekipamentu ne’e la diak maibe ospital rekuza ona, ospital dehan selu tiha mak lori moras ne’e mai. Agora sei ita la resolve ema sira ne’e tenke hein to orsamentu 2018 mak lori ba? Moras ne’e labele hein fali to ita halo roll over, ida ne’e mak urjente”, esplika Adriano.

Ministro Adriano afirma liutan katak se uza sistema uza item seluk ka transfere hosi item ida ba item seluk, kapasidade labele atu halo tanba Lei hatete halo transferensia ne’e labele halo liu 20%, tanba ne’e mak husu OR. Osan iha ne’eba laiha ona, atu foti osan hosi ne’ebe. Dalan uniku mak mai Parlamentu, no parlamentu mak tenke aprova para governu bele halo transfere hosi item ida ba item seluk, hosi ministeriu ida ba ministeriu seluk.

Tuir VII Governu katak baze fundamental hodi selu dividas ba opsital sira iha rai liur tanba responsabilidade no kredibilidade nasaun nian, atu nune’e Timor-Leste labele sai devedor no hatun dignidade estadu Timor-Leste.

Deklarasaun politika hosi bankada CNRT ne’ebe reprezenta Aliansi Maioria Parlamentar (AMP), hatoo ba VII Governu katak OR ne’e la urjensia tanba lauha razaun ba pedidiu OR atu aprova ho karakter urjensia. VII Governu submete fali orsamentu retifikativu iha loron 9 Novembru no Prezidente Parlament baixa ba Komisaun C atu halo paraser ho karakter urujenti tuir pedidu VII Governu nian ne’ebe rejimentu PN regula iha artigu iha 97. Diskusaun no apresiasaun hosi komisaun C detekta katak razaun husu orsamentu retifikativu ho karakter urujenti ne’e laiha ka ho lian seluk laiha razaun ba pedidu orsamentu retifikativu, atu aprova ho karakter urjente.

“Sedauk iha Lei organika VII Governu Konstituisional hodi deskreve kompozisaun estrutura governu ne’ebe refleta orsamental ne’ebe deskreve iha PPL OR. Laiha tabelas ezekusaun orsamental ba despezas no reseitas hosi 9 Novembru ho projecsaun detalhu tuir kategoria no item to ejekusaun 31 Dezembru 2017 ba fundus hotu no servisu sira no fundus autonomos. Laiha justifikasaun ba situasaun ejekusaun ne’ebe kiik ba reseitas ka dotasaun ne’ebe hotu ona. Laiha informasun sobre ativu no pasivu estadu nian. Laiha informasaun kona ba impresimus ne’ebe estadu halo ba tinan 2017. Ho realidade ida ne’e PN so bele halo diskusaun ba PPL OR tuir prosesu normal deit maibe tuir AMP nia hanoin katak ida nee hamosu deit inifikasia juridika tanba maske PN aprova PPL OR, VII Governu sei labele implementa ka ezekuta ”, esplika iha deklarasaun.

Membru Komisaun C Parlamentu Nasional, Mericio Akara ba TAFARA.TL esplika katak hare hosi aspetu tekniku sei iha fundus kontizensia $1.3 Milloens ba kualker nesesidade mak urjenti, bele apresenta ba ministra ka ministru finansas para bele aloka orsamentu kontizensia ba ministeriu relevante no Lei fo dalan (Lei Jestaun Finanseiru) Artigu 37 dehan katak fo kompetensia ba ministra ka ministru atu bele aloka fundus kontizensia ba nesesidade urjenti.

Merico Akara mos informa katak iha opsaun seluk bele iha wiremen ne’ebe maka labele liu 20% ,entaun ba fali idak-idak nia ezekusaun, maibe depende ba nesesidade.

Hatan ba TAFARA.TL liga ho fundus kontizensia $1.3 Millioens ne’ebe mos presija tuir nia dalan karik tenke apresenta iha parlamentu nasional hodi hetan aprovasaun?

Akara esplika katak kona ba aprezentasuan ne’e lolos inkluis mos ezekusaun para bele hatene kada ministeriu ne’e ninia ezekusaun, maibe ida ne’e la aprezenta tanba ne’e ita la hatene ezekusaun ministerial ne’e to ona porsentu hira.

“OJE 2017 sei iha osan $300.000 milloens mak sedauk ezekuta no hela deit fulan ida ho balun hodi gasta. Ba AMP ne’e sufsiente ba fontes tolu ne’e (orsamentu inisiu, wiremen ho kontizensia). Normalmente pagamentu taka iha loron 15 dezembru, tenke hatama proposta pagamentu agora. Se nune’e tau deit iha OJE 2018. Iha nasaun seluk OR ne’e akontese iha July ho Agustus, agora ida ne’e tinan atu remata ona no pagamentu atu taka ona iha loron 15 Dezembru”. Hateten Akara

Responde ba razaun hodi tenke selu dividas hirak ne’ebe akontese iha ospital rai liur tanba governu iha responsabilidade no hare ba kredibilidade estadu. Ba TAFARA.TL depudatu PLP ne’e hatete dividas ne’e sira la apresenta pro ezemplu hospital ne iha hira.

“Ami mos cek hospital Sanglah Bali, National University Hospital Singapore, Siloam. Kapasidade hodi negosia ne’e iha governu, normalmente ita halo kontratu bele negosia no sira intende ita nia prosesu jestaun finansia kona ba orsamentu katak labele selu agora, bele selu tinan oin. Depende ba kapasidade negosia. Informasaun ne’ebe ami hetan katak atu sona deit aimoruk la presiza ba sona iha liur”, haktuir Akara.*[Zevonia Vieira | TAFARA.TL | 22.11.2017]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Lú Olo Hamenu Orgaun Komunikasaun Sosial no Jornalista Atu Iha Kapasidade Investigativu

“Jornalista sira labele kazuistiku katak foti kazu ida sai nutisia, la hatene kazu ne’e akontese …

Leave a Reply

Your email address will not be published. Required fields are marked *