Tuesday , December 12 2017
Home / Sosial & Politika / Terezinha: Prezidente Ignora Ami nia Rekuza, Branco: Tuir Norma Funsionamentu halao iha Komisaun
Vice Prezidente Bankada CNRT halo entrevista ho jornalista sira iha Parlamentu Nasional [Foto: Zevonia Vieira | 05.12.2017]

Terezinha: Prezidente Ignora Ami nia Rekuza, Branco: Tuir Norma Funsionamentu halao iha Komisaun

“kaer ba norma ne’ebe durante tempu tinan 10 resin moris iha Parlamentu nian, maka atividade hotu sei paradu, enkuantu Parlamentu Nasional fokus atu estuda no deskuti, hodi halo audiensia ho governu kona ba proposta orsamentu ne’ebe tama”. Branco

Plenaria iha Parlamentu Nasional ne’ebe sempre halao iha loron segunda no tersa, maibe iha semana ida la realiza. AMP sira ezizi katak ohin loron presiza iha plenaria atu bele hare rekursu ne’ebe bankada opozisaun sira hatama, relasiona ho proposta ba Orsamentu Retifikativu.

Bainhira TAFARA.TL halo konfirmasaun ho Vice Prezidente bankada CNRT, Maria Terezinha Viegas, esplika kona ba razaun hosi bankada opozisaun atu iha plenaria tuir agenda normal.

Vice Prezidente bankada CNRT esplika katak pratika iha Parlamentu Nasional durante tinan hirak ba kotuk, bainhira baixa ona proposta orsamentu ba iha komisaun, atividade seluk laiha maibe se iha asumtu balun ne’ebe importante atu lori ba plenaria, iha konvokatoriu iha plenaria.

“Plenaria ohin loron laiha no mos horseik tanba ho konsiderasaun ne’ebe mak Prezidente fo ba iha komisuan, maibe hosi bloku opozisaun ezizi atu iha plenaria ne’e, tanba iha rekursu desde inisiu, rekursu ne’ebe mak ba iha desizaun Prezidente nian ba baixa relatoriu ne’e iha komisaun C. Rekursu ne’ebe mak ami hatoo ne’e iha loron 20/11. Rekursu kona ba admisaun ne’ebe Prezidente halo ba iha proposta OR, ami rekusa admisaun ida ne’e ho hanoin katak retifikativu laiha fatin ba iha tempu, hare mos ba iha tempu tanba la to’o, se kazu prosesu do urjensia ami vota kontra tiha ona iha tempu ne’eba, nune’e Prezidente opta fali via normal maibe ho hanoin ida katak sei baixa iha komisaun C, ho nia opta hanesan nafatin maibe Prezidente uza artigu 170 katak halo adaptasaun ba prazu sira ne’e ba OR ho urjensia ka nesesidade ne’ebe mak ita iha final do ano ona. Iha konvokatoriu ne’e mos ami la konsege foti no Prezidente la konsege halo admisaun ka ajendamentu ba ami nia rekursu, tanba ida ne’e mak bankada opozisaun marka nia pozisaun la partisipa iha trabalho komisaun nian, liu-liu relasiona ho ajendementu OR”, esplika Vice Prezidente Bankada CNRT.

Terezinha Viegas mos esklarese katak plenaria iha ka la iha depende ba konvokatoriu lideres bankada sira, “iha ne’e pratikamente hanesan Prezidente ignora tiha ami AMP. Funsianamentu parlamentu nian nee segunda ho tersa tenke iha plenaria, Prezidente karik ho konsiderasaun hanoin ho pozisaun ne’ebe iha katak orsamentu retifikativu, maibe Prezidente ignora tiha ami rekuza ne’ebe mak ami aprezenta”.

Iha parte sorin Prezidente bankada Fretilin, Francisco Branco ba jornalista sira, iha loron 5/12, esplik katak norma no lalaok Parlamentu Nasional iha premeira lejislatura to ohin loron ne’e, maka bainhira proposta orsamentu governu nian tama mai parlamentu, atividades hotu-hotu kansela, norma ida ne’e lao durante tinan 10 resin ona no sai tiha ona hanesan regra ida ne’ebe halao durante tempu ida ne’e.

“Tanba sa akontese ida ne’e, tanba hare ba proposta de Lei Orsamentu, katak Lei ida ne’ebe importante tebes ba vida nasaun nian, entaun ho hanoin ida ne’e mak bainhira proposta tama hosi governu, atividade hotu para no laiha razaun ba opozisaun nia proposta, tanba tuir lolos funsionamentu agora dadauk ne’e iha Komisaun sira, tuir despasu Prezidente nian”, esplika Francisco Branco

Tuir Francisco Branco katak se ho forsa extraordinario maka karik bele obriga desizaun kontrario, atu bele ajenda hodi responde ba situasaun ida ne’e, maibe situasaun sei lao normal hela, laiha situasaun extraordinario ida, atu ajenda kestaun extra ordinariu ne’e, hodi halao plenaria ida extraordinaria.

Hatan ba perguntas hosi jornalista STL liga ezejensia hosi opizisaun katak tenke hare uluk rekursu antes halo diskusaun ba OR? Branco responde katak tanba rekursu ne’e mos atividade seluk ida,   kaer ba norma ne’ebe durante tempu tinan 10 resin moris iha Parlamentu nian, maka atividade hotu sei paradu, enkuantu Parlamentu Nasional fokus atu estuda no deskuti, hodi halo audiensia ho governu kona ba proposta orsamentu ne’ebe tama.

Tuir observasaun hosi jornalista sira hatudu katak plenaria la lao maske hosi bloku AMP rasik hein iha sala plenaria no dere sinu hodi hatudu sinal katak atu halao plenaria.*[Zevonia Vieira | TAFARA.TL | 05.12.2017]

 

 

 

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Lú Olo Hamenu Orgaun Komunikasaun Sosial no Jornalista Atu Iha Kapasidade Investigativu

“Jornalista sira labele kazuistiku katak foti kazu ida sai nutisia, la hatene kazu ne’e akontese …

Leave a Reply

Your email address will not be published. Required fields are marked *