Thursday , February 21 2019
Home / Sosial & Politika / STAE Presiza Tempu Sufisiente Hodi Prepara ba Eleisaun Antesipada, Labele Servisu Sem Kondisaun
Diretor Geral Sekretariadu Tekniku Administrasaun Eleitoral [STAE], Acilino Manuel Branco [Foto: Timor Agora]

STAE Presiza Tempu Sufisiente Hodi Prepara ba Eleisaun Antesipada, Labele Servisu Sem Kondisaun

Natureja eleisaun antisipada [EA] la diferente ho eleisaun sira seluk maibe, EA primeiraves foin akontese iha Timor-Leste. Diretor Geral Sekretariadu Tekniku Administrasaun Eleitoral [STAE] hateten, presiza tempu ne’ebe sufisiente atu STAE halo preparasaun no organiza eventu refere.

Diretor Geral STAE, Acilino Manuel Branco hato’o deklarasaun ne’e relasiona ho desijaun Prezidente Republika nian ba empasse politika rai laran, ne’ebe sei entrega ba povu atu deside liu husi Elisaun Antesipada.

Acilino Manuel Branco haktuir STAE la halo preparaasaun bazeia ba espekulasaun ka opiniaun publiku ida ne’ebe mak espalla. Portantu STAE hanesan orgaun tekniku ida, nunka atu kaer espekulasaun publiku sira hanesan baze ida atu bele halo prosesu ruma. Entaun hanesan orgaun tekniku ida ne’ebe assume nia responsabilidade ba halo eleisaun, sempre kaer ba baze legal sira no mos desijaun politika ida ne’ebe mak serteja.

Normalmente elisaun tuir aktus normal konstituisaun RDTL, elisaun ba orgaun soberanu sira tinan lima dala ida. Entaun Orgaun ELeitoral sira mos hala’o sira nia preparasaun normal, tuir tempu ne’ebe mak define ona iha Konstituisaun RDTL no mos ba iha lei eleitorais sira. Situasaun pelu kontrariu, entaun pelu menus tenke iha tempu ida ne’ebe maka la’os to’o tinan ka fulan barak maibe, pelumenus iha tempu ida ne’ebe maka sufisiente para bele halo preparasaun.

“Ohin ita hotu akompaña Chefe do Estadu desidi ona i hakarak ka lakohi Governu atraves Ministeriu Estatal liu-liu STAE tenki asume situasaun ida ne’e. Ho ida ne’e Hau hanoin katak apartir ohin ita haree oinsa atu reuine kondisaun hot-hotu, para atu bele enfrenta eventu inportante ida ke ita bele dehan katak extra ordinariu uitoan no pela primeira vez akontese iha historia Timor ninian” dehan Diretor Geral STAE ba media sira, iha nia knaar fatin, Kaikoli, Dili 26/01

Timor-Leste foin mak atravessa eliisaun Parlamentar iha fulan hirak ba kotuk, Diretor Geral STAE hateten kondisaun balun em termus material, lei sira ne’ebe mak uja ba eleisaun iha hela, agora oinsa tenta atu reuni kondisaun sira hotu, nune’e tenke prontu, para hodi assume situasaun refere.

Acilino esplika liu tan katak, normalmente tuir lei eleisoens Nu. 9/2017 artigu 17 hetete katak se kaju sira hanesan ne’e, minimu loron 60, hahu husi dekretu prezidensial sai bele realiza eleisaun. Mas Imposibel atu implementa prosesu hotu iha loron 60 nia laran. Liga ba iha esperensia eleisaun 2017 foin dadauk no eleisaun sira ba kotuk, husi kalendariu entrada em vigor to’o iha nia rejultadu pelemenus iha loron 90 resin, hahu husi Prezidente dekreta data ba to’o iha Tribunal Rekursu proklama depois publika iha Jornal da Republika por volta de loron 91 ka 92.

Acilino Manuel Branco salienta liutan, ida ne’e atividades ida, sekuensia ne’ebe maka define ona iha lei, nomos ho dekretu sira, materiais preliminarius, operasionais, terrenus, formasaun, rekrutamentus, aprovizionamentus ne’e tenki la’o antes ida ne’ebá.

Dirigente maximu Sekretariadu Tekniku Administrasaun Eleitoral ne’e hateten, em termus de preparasaun, ita foin mak ultrapassa eleisaun ida, materiais sira balun iha hela, ita tenta para atu reuini fila fali, hanesan kavina de votus, urna, ne’e iha kuantidade ne’ebe mak bele dehan sufisiente. Material sira ne’ebe mak uja hotu, entaun ita presija halo fali akijasaun, prosesa fila fali. Hanesan voletim de votus, tinta no materiais eskritoriu.

Entretantu Acilinio antisipa karik iha posibilidade atu aumenta mateirais hirak ne’e, tanba karik iha mobilizaun ne’ebe mak boot, tanba foin dadauk ne’e eleitores 20% resin mak la partisipa, nune’e bele responde bainhira iha mobilizasaun bo’ot no hasa’e taxa partisipasaun ne’ebe mak maka’as liu. Entaun presija tempu ne’ebe mak naton hodi reorganiza material sira ne’e hotu. Maibe iha municipios material sira ne’e preparadu hela iha ne’eba, falta deit mak oinsa iha tempu badak atu identifika fila fali brigada sira, tenki halo fali resenseamentu, maske oras ne’e daudauk atividade resenseamentu hala’o hela iha teritóriu nivel munisipiu, so deit iha diaspora [luar negri], mak seidauk hala’o maibe, tuir lei mak agora vigor ona, direitu sidadaun hot-hotu hanesan, nune’e presija tempu ne’ebe mak naton hodi halo ajustamentu.

Hatan ba perguntas husi media sira kona-ba rekursu finanseiru ba eleisaun antisipada, Acilino Manuel Branco hateten, “ida ne’e desijaun estadu, Hau hanoin katak Estadu atraves de Governu tenki iha kondisaun hodi responde ba situasaun ida ne’e. STAE hanesan Orgaun tekniku, nia labele servisu sem kondisaun. Depois de ida ne’e Ami sei haree oinsa atu bele hato’o situasaun ida ne’e atraves Ministeiru Administrasaun Estatal para atu bele haree tok ho Ministeiru Finansas, depois lori tan ba konsellu ministru atu bele haree posibilidade orsamentu ruma”.

Acilino Manuel Branco hateten orsamentu la’os ba STAE deit maibe, ba orgaun sira ne’ebe mak iha responsabilidade atu garante prosesu eleisaun ne’ebe livre, sekretu no uniforme, hanesan CNE, PNTL, Forsa Defeza para atu bele garante diak liu tan seguransa, inklui mos media.

Relasiona ho kondisaun klima no kondisaun geografika, Acilino Manuel Branco hateten, STAE iha esperiensia naton bazeia ba eleisaun sira mak liu ba. Iha Eleisaun Suku mobiliasaun ba to’o iha aldeia, STAE sempre iha meius oi-oin hodi bele transporta materiais importantes sira ba sentru votasaun.* [Martinho Moniz | Editor: Zevonia Vieira | TAFARA.TL | 26.01.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *