Tama Ona Tinan 15 Nia Laran, Komunidade Suku Liurai Sedauk Asesu Eletrisidade no Bee Moos

Eletrisidade fator importante iha fatin ida, atu bele apoia ema ida nian atividade, bainhira eletrisidade laiha mos bele impede labarik sira ne’ebe tenke estuda iha tempu kalan.

Situasaun ida ne’e mak komunidade iha suku Liurai hasoru, tama ona tinan 15 nia laran povu sai hosi ukun kolonializmu, ho objetivu ida hakarak liberta nia povu, maibe liberta hosi mukit no kiak, estadu Timor-Leste sedauk atinji ho diak.

Bainhira jornalisra TAFARA.TL halo entrevista ho Pesoal Administrasaun Suku Liurai, Amandio da Silva katak durante iha tempu okupasaun Indonesia nian to Timor ukun a’an tinan 15 ona, maibe populasaun  suku Liurai nafatin seidauk asesu ba eletrisidade.

“ami populasaun hamutuk 582 sente triste tebes, tanba iha suku balun mak nabilan tiha ona, maibe ami nia suku mak sedaduk nabilan. Komunidade suku balun ne’ebe dook liu husi ahi inan ne’e asesu ona ba eletrisidade maibe kuitadu ami ida besik hela iha Hera ne’e mak oras ne’e sei nafatin halerik hela ba eletrisidade, maske oras ne’e governu mai halo survey ba fatin ne’e, maibe to ohin loron sai nonok lakon tiha”, tenik Amandio da Silva.

Amandio da Silva sujere ba governu foun ne’ebe sei mosu, bele tau matan ba suku Liurai ne’ebe presija tebes eletrisidade, tanba suku Liurai besik los ho Dili maibe to ohin loron sedauk asesu eletrisidade.

Tuir Amandio laos deit eletrisidade, maibe komunidade mos presija kondisaun dalan, eskola, bee moos.

Entertantu komunidade Sonia da Costa ba TAFARA.TL hateten komunidade suku Liurai durante ne’e kalan loron sempre halerik hela deit ba eletrisidade, maibe oras ne’e governu seidauk loke matan ba komunidade refere.

“hau sedauk senti desenvolvimentu ne’ebe lolos, maske Timor-Leste hetan ona ukun rasik an durante tinan 15 nia laran laiha eletrisidade, susar tebes ba ami atu asessu ba informasaun, no susar tebes mos ba labarik sira atu estuda, tamba sira tenke estuda ho sunu ahi oan, maibe ida ne’e sei sai impaktu boot ba labarik sira nia matan iha future”, tenik Sonia.

Sonia da Costa mos konfesa katak problema ne’ebe komunidade hasoru laos deit eletrisidade maibe estrada, kualidade edukasaun, no bee moos sai hanesan problema boot ne’ebe seriu. Susar atu ba Dili, hodi lori modo ba faan, tanba laiha dalan. Sonia hatoo nia sentimentu triste ba TAFARA.TL iha loron 26/08.

Povu nia halerik kontinua hatoo, iha loron 22 Jullu povu determina sira nia votus ba partidu ne’ebe sira hakarak fo fiar, hodi bele responde sira nia nesesidade. Ohin loron suku Liurai no suku sira seluk hein governu foun atu bele atinji promesa sira ne’ebe sira hakarak halo ba povu.

Sura deit loron povu hotu sei asiste reprezentante povu no governu foun atu kontinua dezenvolve rai doben ida ne’e. povu iha mehi ida deit hakarak moris adekuadu no ses hosi mukit.* [Hendrique de Jesus | TAFARA.TL | Editor Zevonia Vieira | 29.08.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.