Friday , August 17 2018
Home / Divertimentu / Tempu Badak Filme A[R]MANDA Sei Realiza, Eufrasia: Filme Ne’e Konaba Dame Laos Funu
Administradora Filme A[R]MANDA, Eufrasia esplika konaba filme A[R]MANDA iha CCD. [Foto: Zevonia Vieira | 17.03.2018]

Tempu Badak Filme A[R]MANDA Sei Realiza, Eufrasia: Filme Ne’e Konaba Dame Laos Funu

“Istoria A[R]MANDA, filme ida ne’e koalia konaba dame ho background Timor nia kultura, ho tradisional ne’ebe forte. Nia setingan hau hili 100 tinan liu ba tamba hatudu katak ita nia natureza tempu uluk mak hanesan ne’e, ita nia kultura tradisional labele lakon, sei bele ita kontinua nafatin”. Eufrasia Vieira

Iha tempu badak film ho titlu A[R]MANDA sei produs. Liu hosi konferensia imprensa administradora ka xefe produser ba film A[R]MANDA, Eufrasia Vieira hatoo ba publiku katak, harii United Picture Production, nia objetivu atu produs filme ne’ebe diak ho kualidade, ba ema Timor hotu.

“Ita hotu ema Timor no ita fiar aan katak ita iha kapasidade atu halo buat hotu pelemenus ho kualidade hanesan mos iha nasaun seluk. Iha parte aat no mos iha parte filme sinema, ami iha mehi ida atu kria projetu kompletamente nasional ne’ebe ema Timor oan mak halo e ema Timor mak halimar, ba publiku Timor oan, e ami hakbesik aan ba vitoria ona tanba semana oin ami komesa shooting ona”, hateten Eufrasia ho naran konnesidu Quiqa, iha CCD 17/03

Quiqa hatutan liutan katak filme A[R]MANDA ne’ebe sei produs sei lori ba to iha kompetisaun internasional ka festival internasional. Buat hotu ho humilidade katak, lider sira sempre hanorin, durante luta ba independensia no dezenvolvimentu objetivu principal atu prepara rekursu humanus ho kapasidade hodi kria produsaun filme iha Timor-Leste, “ami mos hakarak atu fo inspirasaun ba jerasaun foun atu bele espresa sira nia kreatividade liu husi filme”.

Hatan ba perguntas hosi TAFARA.TL konaba tanbasa mak titlu filme naran A[R]MANDA, ba TAFARA.TL Quiqa responde filme ne’e uluk naran AMANDA ne’e hanesan simoblais deit iha tinan 80 ne’ebe mak fo sai ona. Hosi United Picture Production hanoin atu uza fali naran A[R]MANDA maibe ho kultura no istoria Timor nian.

“Kolia konaba istoria A[R]MANDA, filme ida ne’e koalia konaba dame ho background Timor nia kultura, ho tradisional ne’ebe forte. Nia setingan hau hili 100 tinan liu ba tamba hatudu katak ita nia natureza tempu uluk mak hanesan ne’e, ita nia kultura tradisional labele lakon, sei bele ita kontinua nafatin, tamba bainhira ita hatais bistidu bonita laos tau estranjeiru nia produtu ho rai seluk, mais produtu ita nian ne’ebe ita nia nai ulun sira, familia sira, inan doben sira halo ho sira nia sofrementu, ho sira nia tempu. Iha Armanda ne’ e ami lakoi halo filme konaba funu,maibe ami hakarak halo filme konaba domin. Domin ne’ebe konaba kultura, ne’ebe konaba ita nia identidade, domin entre ema hanesan maun alin e bin alin, tanba ita Timor ran ida deit. Armanda mos kolia konaba kestaun nasional, katak feto nia partisipasaun iha sosiedade no problema violensia domestika no ninia orijen. Filme ida ne’e istoria ida ne’e, mensajem ida ne’e katak ita hodi ita nia kultura barlaki ho diak ho positivu, laos hodi ba negativu nian, tanba ita fo folin feto hanesan ita nia kultura, tanba hanesan ita nia respeitu ba familia husi mane ho feto nian. A[R]RMANDA lori mensajen paz no Domin no fo harohan ita nia kultura no identidade Timor, laos rai deit maibe ema wainhira ema moris ho paz, rai mos sei paz”, hateten Quiqa

Entretantu Prezidentr RTTL, Gil da Costa ne’ebe partisipa mos iha konferensia imprensa hatoo katak, agredese ba buibere oan ne’ebe bele aprezenta Timor iha mundu tanba ne’e RTTL prontu atu suporta ba produsaun filme ida ne’e.

“Hau kontente ho ida ne’e dala barak ita kolia konaba politika deit, dala barak ita kolia konaba funu deit, maibe la hatene kolia konaba domin. Hau sente istoria A[R]MANDA historia ne’ebe importante ba ita hotu katak, kuandu ita fo barlaki ba ita nia feton ita labele hanoin katak ita hola ona feto ida ne’e, ne’ebe halo konforme ita nia hakarak, maibe tuir tradisaun ne’ebe ita aprende ho barlaki ne’ebe ita respeita fo dignidade diak ba ita nia moris loron-loron nian. Hau sente mana Eufrazia ne’ebe sei sai hanesan Armanda, sei reprejenta laos Timor deit maibe liu-liu reprejenta buibere sira ne’ebe tinan ba tinan hetan violasaun tan deit liafuan barlaki ne’e. Hau sente filme ne’e sei reprezenta ita katak barlaki ne’e atu dignifika buibere sira nia direitu, nia valor sai aas liu”, hateten Gil

Gil hatutan katak liu hosi filme ida ne’e bele mos motivasaun ba joven sira, atu bele kreativu liutan, sai animador tanba presiza espresaun ne’ebe diak, fo positivu no labele hanoin tan funu.

Lia fuan hanesan mos hatoo hosi Ministru Turismo, Manuel Vong katak Turismo hanesan industria ne’ebe liga ho entertain hanesan filme, tanba liu hosi entertain bele aprezenta Timor-Leste hanesan distintu istoriku iha rai seluk.

“Ita hotu hatene Timor-Leste hanesan distintu istoriku foun, presiza fo prioridade ba buat sira rua, mak hanesan dezenvolve no kualifika ita nia produtus sira tomak, ida seluk mak ita presiza halo promosaun no marketin investimentu iha ita nia produtu tomak. Inisiativa ida atu loke dalan oinsa atu lori Timor ba mundu, tanba ida ne’e valorizasaun ba ita nia kultura sai hanesan rekursus turistikus ida ne’ebe importante tebes ba iha rai ida ne’e no mos ita nia natureza ne’ebe mak furak”, hateten Manuel.

Filme A[R]MANDA ne’e hetan apoio hosi RTTL, Timor Plaza, NITL, SYLVIA Dili, Super Bock, Rentlo, RMS, Pateo, Timor Telcmo, KMANEK no EHRD. * [ Virginia Pereira | Editor: Zevonia Vieira | TAFARA.TL | 18.03.2018 ]

About Virginia Pereira

Check Also

Ekipa Futebol SLB halakon Ekipa DIT FC ho Score 2-1

Klubu futebol SLB Laulara halakon klubu futebol DIT ho escore 2-1 iha kompetisaun liga amadora, …

Leave a Reply

Your email address will not be published. Required fields are marked *