Monday , March 25 2019
Home / Eleisaun Parlamentar / TMR: Rezultadu Saida Deit, PARPOL Hotu inklui PLP Tenki Simu
Sidadaun Hotu iha direitu tomak hodi exerse sira nia votu, hanesan mos eis Presidente RDTL, Taur Matan Ruak.[Foto: Martinho Moniz | TAFARA.TL | 22.07.2017].

TMR: Rezultadu Saida Deit, PARPOL Hotu inklui PLP Tenki Simu

“Nasaun ne’e lori ruin ho ran mak sosa, laiha bulak ida iha Timor mak kontinua hakarak Timor nia at, tamba ne’e rezultadu saida deit mak povo fo, partidu hotu-hotu inklui PLP tenki simu.”

Lia ne’e hato’o husi Presidente Partido Libertasaun Popular (PLP), nudar mos Eis Prezidente Republika RDTL, Taur Matan Ruak hafoin ezerse nia direitu siviku nu’udar sidadaun Timor-Leste hodi tuir votasaun Eleisaun Parlamentar 2017, iha Sentru Votasaun Metiaut, DIli.

Taur Matan Ruak hato’o nia sentidu haksolok tamba bele partisipa iha eleisaun jeral tinan ida ne’e. Maske la’os ona hanesan Chefe Estadu maibé nu’udar lider Partidu Politiku iha nafatin komitmentu hodi servisu no serví nafatin ba povu Timor-Leste.

“Hau kontenti loos tamba bele partisipa iha eleisoens. Dala ida ne’e la’os ona hanesan Chefe Estadu, maibe hanesan lider partidaria. Exerse Ami nia Direitu hanesan sidadaun sira seluk. Saida mak povu fo, ami la buka poder, poder ne’ebe mai ne’e husi povu i ami simu ida ne’ebe povu fo. Ho hanoin tomak, ho intensaun kontinua nafatin servi ba nasaun ida ne’e, liu liu ba sira ne’ebe presija ami nia ajuda no tulun,” tenik Taur Matan ruak.

Hatan ba perguntas husi Jornalista sira kona-ba oinsa karik PLP la liu bareira 4% hodi hetan asentu parlamentar? Taur Matan Ruak esplika, “PLP nia objetivu la’os atu manan iha eleisoens, PLP nia objetivu mak hotu-hotu ne’ebe ukun Timor nia iha espiritu de justisa, haree ba ema hotu-hotu, liu liu ba sira ne’ebe terus barak liu, kontinua terus ida ne’e. PLP iha sira nia sorin, kontinua servisu ba sira, ezize sira ne’ebe ukun tau matan ba sira, tamba sira mak na’in nasaun ida ne’e nian.”

Eis Chefe Estadu ne’e hato’o nia agradesimentu ba povu Timor nia sivismu, partisipasaun tomak iha eleisaun ba tinan ida ne’e. Nia parte senti orgullu tamba seidauk hare depois de Timor independente hanesan nasaun, lahare eleisoens ida diak hanesan ida foin lalais ne’e, buat hotu normal, ema hotu partisipa, ba Joven sira Taur Matan Ruak fo hau nia hakoak boot, parabens ba povu Timor.

Iha sorin seluk, Madre Superiora husi Kongregasaun Carmelita, Me. Natalia Domingas de Jesus Ferreira, hato’o nia sentidu orgullu nu’udar sidadaun Timor. Nia espera katak eleisaun ida ne’e bele la’o ho diak, lao ho hakmatek i buat hotu susesu. Nia espera governu foun bele realize planu sira la’o ho diak.

“Ita hein katak ho Nai Maromak nia tulun Governu foun ida mai ne’e bele realiza planu hotu ho diak. Atu nune’e povu Timor ida ne’e bele moris iha domin, hakmatek, unidade nia laran, nu’udar povu ida ne’ebe harí nia Ai-rin iha Nai Maromak nia futar oin. Tuir Hau nia Hanoin Governu ne’ebe mai importante fo liman ba malu atu hari unidade atu nune’e povu ida ne’e moris iha hakmatek no unidade nia laran,” dehan Madre Natalia Domingas de Jesus Ferreira ba TAFARA.TL iha Sentru Votasaun Farol, Dili.

Membru Komunidade Suku Motael, Ester Lopes Mouzinho salienta, Nia sente kontenti tamba eleisaun ida ne’e la’o ho diak no hakmatek. Esperansa ba Governu foun mai bele halo diak liu tan dezenvolvimentu ba Povu no nasaun Timor-Leste, ba partidu ne’ebe mak ukun karik servisu hamutuk atu nune’e bele hadia diak liutan nasaun ida ne’e.

Membru Konsellu Nasional Juventude Timor-Leste [CNJTL], João do Nascimento, orgullu ho foinsa’e sira tamba kopera no iha komitmentu hodi kria situasaun ne’ebe kondusivu, paz, harmonia iha festa demokrasia ida ne’e. Nia husu ba Juventude sira atu nafatin mantem pozisaun hodi sai ajente ba paz no estabilidade.* [Martinho Moniz  | TAFARA.TL | Editor: Ato “Lekinawa” Costa | 22.07.2017].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *