Saturday , May 25 2019
Home / Sosial & Politika / UNDP Entrega Ekipamentu Radio Mobile Ba CRC, Apoio Komunidade Sira Bele Asesu Informasaun Ba EA
Konseileru Embaixada Japaun iha Timor-Leste, Shingo Higashimoto entrega radio mobile ba Diretor CRC, Luis Evaristo Soares. [Foto: Dokumentu UNDP TL | 27.02.2018]

UNDP Entrega Ekipamentu Radio Mobile Ba CRC, Apoio Komunidade Sira Bele Asesu Informasaun Ba EA

“Wainhira laiha jestaun diak, fahe informasaun mak la kredivel, ema sira, liu-liu votante sira sei foti desizaun ne’ebe mak sala, liu-liu sira ne’ebe mak hela iha area rural, ne’ebe mak nunka asesu ba midia”. Shingo Higashimoto

Programa asistensia eleitoral, liu hosi UNDP iha Timor-Leste, ne’ebe hetan apoio hosi governu Japaun, entrega ekipamentus radio mobile ba Centro Radio Comunidade [CRC.]

Liu hosi seremonia entrega ekipamentus, ne’ebe halao iha kampaun UNDP Kaikoli, 27/02, Diretor CRC, Luis Evaristo Soares hatoo palestra katal, programa ne’e bolu naran asistensia eleitor ba komunidade social, iha diresaun nasional ba Centro Radio Comunidade.

“Hetan pakote ida, ita hanaran radio Mobile, ekipamentu tomak ida ba estasaun radio ida, ita bele instala iha fatin ne’ebe deit mak la asesu ba midia, tamba ne’e mak ami nia tekniku prontu ona ho ekipamentus”, esplika Luis Evaristo Soares.

Luis Evaristo mos hatutan katak, oras ne’e dadaun CRC koalia hamutuk ona ho orgaun eleitoral hanesan CNE no STAE, hodi prepara informasuan edukasaun siviku, hodi fahe ba komunidade sira, liu hosi radio mobile, hodi nune’e bele kobre iha area hotu ne’ebe mak la asesu ba radio no televisaun.

Objetivu boot husi fahe ekipamentu radio mobile ne’e, atu bele lori ba hatur iha fatin ne’ebe la asesu ba midia, hodi transmite informasaun sira ne’e ba komunidade sira.

Iha fatin hanesan, Sekretaria Estadu Konselho Ministru no Komunikasaun Sosial [SECMECS], Matias Freitas Boavida, hatoo agredesimentu ba UNDP no embaxada Japaun tanba bele tulun povu Timor-Leste, hodi asesu informasaun.

“Importante ba pais ida ne’ebe hahuu atu halo demokrasia ida ne’ebe ema barak mehi, atu bele implementa ho diak. Importansia ne’e sei bele hakbiit liu tan, artigu ne’ebe hakerek iha Konstituisaun koalia hela kona-ba Liberdade Imprensa, art. 40”, tenik Matias Boavida.

Ho apoio ida ne’e, SECMECS hein katak, liu hosi servisu hamutuk, embaxada Japaun no UNDP bele hakbiit liutan ema hirak ne’ebe mak sei utiliza ekipamentu sira ne’e, nune bele utiliza duni, laos ba fahe deit informasaun falsa, maibe prezensa radio mobile bele fo benefisiu boot liu ba komunidade iha baze, ne’ebe hamlaha no hamrok ba informasaun iha eleisaun antesipada.

Iha seremonia refere, 27/02 Konseileru Embaixada Japaun iha Timor-Leste, Shingo Higashimoto hateten ajuda ida ne’e hanesan parte ida, atu hatudu povu Japaun nia komitmentu ba nasaun sira ne’ebe mak presiza ajuda.

“Ida ne’e hanesan oportunidade boot ida ba Japaun atu hatudu ninia prezensa, hatudu ninia komitmentu, hatudu ninia partisipasaun iha ajudus boot sira iha tempu ne’ebe apropriadu, hanesan ita hatene katak agora ita sei iha eleisaun”, hateten Shingo.

Shingo salienta liutan katak ho ekipamentu sira ne’e, fiar katak nasaun ida ne’e sei tau iha dalan ne’ebe los kona-ba prosesu eleisaun nian. Wainhira laiha jestaun diak, fahe informasaun mak la kredivel, ema sira, liu-liu votante sira sei foti desizaun ne’ebe mak sala, liu-liu sira ne’ebe mak hela iha area rural, ne’ebe mak nunka asesu ba midia, maibe ho ekipamentus ne’e hau iha esperansa boot ba sira ne’ebe hela iha area rural bele asesu informasaun ho fasil.

Seromonia entrega ekipamentu ne’e, hetan partisipasaun hosi SECMECS, Koseleiru Embaixada Japaun no Radio Komunidade hosi municipio. *[Maria do Ceu | Editor: Zevonia Vieira | TAFARA.TL | 27.02.2018].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *