Tuesday , March 26 2019
Home / Ekonomia & Bisnis / UNDP-KJFL Realiza Kompetisaun Negosio Resiklazen, Negosio Sosial Importante Hodi Resolve Problema Sosial
UNDP Knua Juventude FIla-Liman hamutuk ho grupu negosiu resiklazen sira loron kompetisaun. [Foto: Zevonia Vieira | 29.11.2018]

UNDP-KJFL Realiza Kompetisaun Negosio Resiklazen, Negosio Sosial Importante Hodi Resolve Problema Sosial

Iha realidade ita iha dalan rua deit: primeiru, ita sai patraun ba ita an rasik, no segundu, ema seluk sai patraun ba ita,” Aurito Kanuth Rodrigues Bahan, Xefe Departamento Peskiza Mercado e Apoio Empresarial, IADE.

UNDP Knua Juventude Fila-Liman halo kompetisaun ba dahuluk liga ho negosiu resiklazen ne’ebe partisipa hosi grupu haat mak hanesan grupu Huco Youth, Irene Group, 3R no Centro Sover.

Iha loron kompetisaun refere UNDP Project Manager, Anderias Tani hato’o ba partisipante sira katak Knua Juventude Fila-Liman nudar projetu hosi UNDP Timor-Leste ne’ebe mak fo oportunidade importante rua ba joven sira. Ida mak oportunidade ba foinsa’e sira atu bele kria servisu rasik liuhusi treinamentu oinsa joven sira bele deskobre sira-nia potensialidade, no ida seluk mak fo oportunidade hodi hakbiit lian foinsa’e.

Anderias informa katak Knua Juventude Fila-Liman harii ho konseptu Social Business [Negosiu Sosial. Red] e konseptu ne’e hetan inspirasaun hosi peritu ida, naran Muhamad Yunus. “Social business nia sentidu mak oinsa negosiu ida bele kontribui rezolve problema sosial, no laos hare deit ba osan”. Nia informa katak desde sentru nee estabelese iha fulan Agustu 2017, “foinsae liu 400 mak simu ona treinamentu, maibe nain 40 deit mak konsege dezenvolve sira nia planu negosiu.

Knua Juventude Fila-Liman [KJFL] kontinua eksplora rekursu produktivus hodi apoiu foinsa’e sira diak liutan, liu-liu ba grupu sira ne’ebe kreativu esplika Anderias

Iha fatin hanesan, Reprezentante UNDP Timor-Leste, Felisberta Moniz esplika katak kompetisaun ida-ne’e hanesan etapa premeiru ka preparasaun ba eventu nasional ne’ebe sei halao iha fulan Janeiru 2019. Eventu nasional ne’e sei liga ba Inisiativa Rejional UNDP nian, ho naran Youth Co-Lab, no sei lori hamutuk nasaun sira iha rejiaun Azia Pasifiku hodi aprezenta sira nia ideas inovativus. Tuir planu, Timor-Leste kompatisaun iha nive nasional sei foka ba area haat: Jestaun Lixu (resiklazen), Turizmu Sustentavel, Agrikultura no Enerjia Renovavel. Nunee, akampamentu negosiu sosial durante loron tolu nomos kompetisaun nee hanesan faze importante hodi hakbiit ba foinsae sira-nia kunhesimentu konaba konseptu nee.

“Ami husu ba ita boot sira atu la para iha ne’e deit, imi bele fo servisu ba joven sira seluk alende hetan rendimentu ba imi nia an rasik ”, esplika Felisberta.

Iha tempu hanesan Xefe Departamento Peskiza Mercado e Apoio Empresarial, IADE , Aurito Kanuth Rodrigues Bahan, ne’ebe sai hanesan mos juri iha kompetisaun refere hateten eventu ida ne’e importante tebes tanba UNDP halo opsaun barak ba joven sira atu kria atividade ba joventude sira, atu nunee joven sira iha oportunidade barak asesu ba dalan atu sai emprezariu. “Iha realidade ita iha dalan rua deit: primeiru, ita sai patraun ba ita an rasik, no segundu mak ema seluk sai patraun ba ita,” hateten Aurito

Aurito apresia tebes kolaborasaun entre IADE ho UNDP bele kontinua motiva joven sira hodi involve an iha mundu negosiu, nunee sai patraun ba an-rasik no bele rekruta joven sira seluk hodi hamenus dezempregu. Maske nunee nia sublinha katak negosiu ne’ebe importante liu mak negeosiu ne’ebe ho nia merkadu.

Iha kompetisaun nee, ekipa juri neebe kompostu husi IADE, PERMATIL no Kor Timor-Leste anunsia premeiru lugar monu ba grupu 3R [Recycling, Reuse, Reduce], segundu lugar mak Irene Group no terseiru lugar mak HUCO Youth Group. Alende nee, Grupu Centro Sover sai hanesan vensedor ho kategoria ‘Diak-liu” husi grupu tolu seluk.

Tuir planu etapa da daruak sei loke ba grupu negosiu turismo nian ne’ebe sei organiza hosi UNDP Knua Juventude Fila-Liman. * [ Ekipa UNDP Knua Juventude Fila-Liman | TAFARA.TL | 29.11.2018 ]

 

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

HUCO Youth: Negosiu Resiklazen, Oportunidade Hanorin Foinsa’e Timoroan Sai Sidadaun Ne’ebe Responsavel.

Lixu nudar problema boot ida ne’ebe bele fo ameasa ba ema no animal, no risku …

Leave a Reply

Your email address will not be published. Required fields are marked *