Tuesday , May 21 2019
Home / Ekonomia & Bisnis / UNDP-KJFL Realiza Seminar Industria Turismu, Liu Renfei: Turismu Sei Kontribui Makaas Ba Ekonomia TL
Juventude sira partisia iha seminariu liga ho Empreendedorismu Foinsae foka ba Industria Turismu. [Foto: Zevonia Vieira | 17.12.2018]

UNDP-KJFL Realiza Seminar Industria Turismu, Liu Renfei: Turismu Sei Kontribui Makaas Ba Ekonomia TL

UNDP Knua Juventude Fila-Liman realiza Seminariu ida liga ho Empreendedorismu Foinsae foka ba Industria Turismu. Iha abertura ne’e, UNDP Deputy Country Director, Liu Renfei hatoo ba partisipante sira katak setor turismu nudar setor ne’ebe kontribui makaas ba ekonomia global. Iha Timor-Leste seitor turismu komesa dezenvolve dadauk.

Liu Renfei hateten katak iha governu nia politika ba dezenvolvimentu turismu nian, governu hakarak atu lori maizumenus turista 200,000 hosi rai liur mai Timor, ho objetivu hakarak kria maizumenus 15,000 servisu kada tinan ba Timor oan sira, maibe objetivu ne’e sei labele atinji kuandu juventude sira la partisipa.

“74% populasaun Timor mak maioria joven, ne’e hatudu katak joven sira mak bele lori no dezenvolve Timor ba oin, tanba ne’e mak UNDP hamutuk governu Timor-Leste ho parseiru sira estabele Knua Juventude Fila-Liman ba joven sira atu bele mai aprende, mai fahe, halo ligasaun atu bele realiza joven sira nia ideas hodi sai ita boot sira nia negosiu sosial ne’ebe mak fo servisu ba ita boot nia an rasik no mos ajuda resolve problema iha komunidade no ajuda dezenvolve ekonomia Timor-Leste”, hateten Liu Renfei

Ho objetivu hosi UNDP harii Knua Juventude Fila-Liman, Liu Renfei hakarak konvida joven sira hodi visita Knua Juventude, atu nune’e ekipa sira iha Knua refere bele gia no fo matadalan ba joven sira, oinsa bele realiza joven sira nian ideas no kria negosiu ne’ebe sustentavel.

“Knua Juventude Fila-Liman nudar joven sira-nia uma, fatin hodi aprende no fahe esperiensia ba malu hodi dezenvolve joven sira future, nune’e bele ajuda governu dezenvolve ekonomia no atinji dezenvolvimentu sustentavel”, hateten Liu Renfei.

Iha fatin hanesan, Administrador Centro Informasaun ba Turismu, Antonio da Silva, aprezenta politika dezenvolvimentu turismu nasional ne’ebe aprova iha tinan 2017. Nia haktuir katak politika refere no sai hanesan matadalan atu bele gia no dezenvolve aktividades hotu iha seitor turismu.

“Ita nia lukru hosi numeru vizitante internasional, ne’ebe uza vistu turistiku, maizumenus 70,000 liu, no sira ne’ebe mai halo atividade turistiku 36,000 resin, no sira seluk mai halo negosiu. Ida-ne’e [signifika] ekonomikamente kontribui ba Timor-Leste”, esplika Antonio da Silva.

Antonio da Silva subliña katak turismu sai pilar importante ba dezenvolvimentu turismu iha Timor-Leste, liuhusi turismu fanun natureza no promove natureza ho objetivu atu proteje riku-soin sira, dezenvolvimentu turismu tenke iha serbisu parseria diak ho setor privadu no organizasaun sira seluk.

Iha tempu hanesan, Fundador no Diretor ba Kompaña Timor Adventures, David Carlos nuudar orador ba seminariu nee hateten katak, Timor-Leste iha potesialidade boot ba industria turismo. Maske nunee, joven neebe hakarak atu sai ema Empreendedor iha area turismu tenke prepara planu ho jestaun ne’ebe diak.

“Iha kontestu Timor-Leste, turismu presiza promove halo diak liutan, dalaruma defisil no lori tempu oituan hodi bele dezenvolve seitor turismu. Sei ita hakarak halo negosiu ruma iha area turismu no ita prepara ona, bele konvida ema seluk hodi koko ideas ne’ebe ita halo, nune’e bele hetan input hosi sira”, esplika David Carlos.

David Carlos mos konfesa katak tinan sia liu ba nia harii Timor Adventure ho objetivu ida atu lori ema estranjeiru barak mai Timor-Leste hodi gasta sira nia osan iha rai Timor, maibe presiza asegura kondisaun ne’ebe bele halo ema sira sente seguru, avontade no labele halo sira sente la-satisfas ou fila ba sira-nia rain ho istoria tristi.

Hanoin hanesan hato’o mos hosi Shella Smith da Cunha, orador hosi Kompania Dive, Track and Camp. Shella hateten katak obstaklu iha seitor turismu nian ba Timor-Leste hodi sai hanesan destinasaun ba merkado mak infraestruturas, inklui fatin no asesu internet. Tamba iha era globalizasaun, teknolojia nudar fator importante ida ne’ebe hotu bele asesu.

“Ema barak iha rai liur mak sedauk bele asesu informasaun diak konaba Timor-Leste liga ho fatin turismu sira. Entaun ema rai liur barak mak sedauk hatene fatin turistiku sira ne’ebe furak iha Timor-Leste. Ita presiza fahe informasaun konaba ita nia kultura, natureza no fatin istoria sira liu hosi promosaun. Hau sente website ne’ebe ema barak kria liga turismu iha rai-laran sedauk bele hatan nesesidade ne’ebe iha, atu bele dada ema barak mai ita nia rain”, tenik Shella.

Ho obstaklu ne’ebe Timor-Leste sei hasoru, tuir Shella nia esperansa katak seitor privadu sira ne’ebe servisu iha area turismu nian presiza servisu hamutuk ho governu diak liutan atu bele promove fatin turismu sira.

Shella hatutan katak obstaklu seluk ne’ebe Timor-Leste sei enfrenta mak konaba koneksaun entre nasaun liuhosi lalehan, tasi no rai sedauk forte. Nia rekomenda katak presiza dezenvole liutan parte transportasaun iha area tolu refere, hodi bele atrai turista sira mai vizita Timor-Leste.

Juventude sira partisipa iha seminariu ida liga ho Empreendedorismu Foinsae foka ba Industria Turismu. [Foto: Zevonia Vieira | 17.12.2018]

Estudante hosi DIT, fakuldade Turismu, Emilia Barreto ne’ebe partisipa iha eventu refere hato’o nia sentimentu katak seminariu liga ho turismu ne’e importante tebes ba estudante sira ne’ebe estuda konaba turismu, tanba bele fo ideas no hanoin atu bele hamosu hanoin ne’ebe inovativu, atu iha futuru bele dezenvolve seitor turismu nian.

Emilia kontente ho programa ne’ebe UNDP-KJFL kria tanba bele prepara joven sira atu sai joven empreendedor no kontribui ba dezenvolve rai doben ida ne’e.

Hau apresia tebes servisu hosi UNDP ne’ebe harii Knua Juventude Fila-Liman tanba bele tulun estudante sira no prepara ami hodi bele halo diak iha ami nia moris. Ami bele prepara an atu partisipa iha dezenvolvimentu nasional no ajuda governu hodi dezenvolve ekonomia ne’ebe diak liuhosi seitor turismu. Ba hau, Timor-Leste nuudar rai ne’ebe uniku ho fatin istoriku furak barak, ema liur sira presiza aprende no hatene klean liutan konaba Timor-Leste”, tenik Emilia.

Emilia husu ba UNDP Knua Juventude Fila-Liman atu habelar liutan programa sira ba iha universidade atu bele inspira no motiva estudante sira, atu komesa hanoin saida mak presiza halo hodi bele kria servisu ba an rasik.

Seminariu nee hetan partisipasaun masimu hosi estudante universitariu sira hosi UNTL no DIT, Emprendedor foinsae sira, no Grupu Foinsae sira. * [ Ekipa KJFL  | TAFARA.TL | 17.12.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

UNDP-KJFL Realiza Kompetisaun Negosio Resiklazen, Negosio Sosial Importante Hodi Resolve Problema Sosial

Iha realidade ita iha dalan rua deit: primeiru, ita sai patraun ba ita an rasik, …

Leave a Reply

Your email address will not be published. Required fields are marked *