Tuesday , March 26 2019
Home / Siensia & Teknolojia / UNDP Lansa Laboratoriu 3D Inovasaun, Dulce: Governu Iha Responsabilidade Hodi Haforsa Liutan Programa Ne’e
Ministra Edukasaun, Juventude e Desportu, ho nia kometiva, Country Director UNDP, Claudio Providas ho joven sira hasai foto hamutuk iha loron lansamentu 3DI Lab iha UNDP Knua Juventude Fila-Liman. [Foto: Zevonia Vieira | 07.03.2019]

UNDP Lansa Laboratoriu 3D Inovasaun, Dulce: Governu Iha Responsabilidade Hodi Haforsa Liutan Programa Ne’e

UNDP Timor-Leste halo istoria foun hodi harii “Laboratoriu Inovasaun 3D” [Lab 3DI] – laboratoriu inovasaun no empreendedorismo dahuluk iha Timor-Leste ne’ebe sei atende knaar kataliku hodi dezenvolve rekursu humanu, inovasaun no empreendedorismo foinsa’e no inklusivu ba dezenvolvimentu ekonomia hodi halo mudansa ba siensia ekonomia iha nasaun demokratiku ida ne’e.

Laboratoriu ne’e sei lansa iha Knua Juventude Fila-Liman [KJFL] hosi UNDP Timor-Leste, inisiativa ba istoriku ida ne’e, sei halo parseiru ho governu Timor-Leste no Asia School Business, nudar eskola konaba negosiu, ne’ebe harii hosi Banku Central Malaysia no Massachusetts Institute Technology .

Ministra Edukasaun, Juventude e Desportu, Dulce de Jesus Soares iha loron lansamentu 3DI hateten programa ne’ebe halo hosi UNDP servisu hamutuk ho Sekretariu Estadu Juventude e Desportu no Sekretariu Estadu Formasaun Profesional e Empregu hodi dezenvolve juventude sira nia kapasidade ne’ebe tama ona iha nivel as tanba liga joven sira ho teknolojia, ida ne’e postivu tebes.

“Governu iha responsabilidade hodi haforsa liutan programa ida ne’e ba oin. Ida mak presiza refleta hanesan alin joven nia hanoin katak thinking like a baby siginifika katak labele hanoin hanesan ema ne’ebe iha osan barak kedas maibe komesa hosi kiik oan. Ami sei hare dalan saida mak ami bele kontinua servisu ho UNDP atu bele haforsa atividade ne’e tanba atividade ida ne’e importante”, hateten Dulce Soares iha Knua Juventude Fila-Liman, 07/03.

Dulce Soares husu ba joven sira atu labele pesimista maibe tenke optimista katak ami bele, “hau kontente tebes tanba hau rona kauze joven 5000 mak mai asesu Knua Juventude Fila-Liman. Komesa ba oin hau mos hakarak mai aprende iha ne’e no bele hare joven sira mai duni ka lae. Ami prontu apoia kreativade joven sira nian, halo komunikasaun ho diak no aproveita sentru ne’e ho diak no bele iha posibilidade atu lori sentru ne’e ba to iha municipiu, hodi enkoraza joven sira atu hetan oportunidade hodi aprende liutan konaba empreendedorismo ho pratika sira hanesan ne’e.

Country Director UNDP Timor-Leste, Claudio Providas ba partisipante sira hateten kontente tebes tanba iha loron lansamentu 3DI Lab hetan partisipasaun hosi governu, agensia internasional, embaixada Estadus Unidus, BNCTL, Telemor no grupu joven sira.

Claudio Providas hateten liu metade hosi populasaun Timor-Leste mak joven ho idade 35 mai kraik, barak mak laiha servisu, tanba ne’e Knua Juventude estabelese iha fulan Agustu 2017 ho misaun ida atu transforma joven dezempregu sira sai transformador no emprendedor social hodi ajuda dezenvolve Timor nia ekonomia.

“Ita presiza halo liutan atu hakbiit joven sira hodi prontu responde ba demanda hosi ekonomia digital ne’ebe dezenvolve lais loos. Tuir relatoriu hosi Google katak ekonomia digital iha Asia Sudestuku sei aumenta makaas ba biliuan $240 iha deit tinan walu tuir mai. Ho aumenta 10 % iha serbisu kompara ho 1% – 3% iha industria seluk, iha projeksaun katak ekonomia digital sei aumenta ba serbisu miliaun 12 bainhira tinan 2025”, hateten Claudio

UNDP iha hanoin katak Lab Inovasaun 3D estabele ba joven Timoroan atu hakbiit asira nia abilidade sekulu 21, hanesan komunikasaun, kolaborasaun, hanoin kritiku, resolve problema, kreatividade no operasaun teknolojia nune’e sira bele prontu iha futuru ekonomia digital.

Knua Juventude Fila-Liman kompleta ho 3D Innovation Lab no ninia instrumentu no materia sira, serve hanesan sentru nasional ida ne’ebe sei kapasita lider juventude sira, empreendedor, eskola, universidade no instituisaun sira iha dezenvolvimentu Abilidade Seculo 21 no siensia, teknolojia, Engeneria, no Matematika. Ikusliu, fornse plataforma ida ne’ebe serve hanesan katalizador ba dezenvolvimentu kapital umanu, inovasaun no emprendedorismu juventude, no dezenvolvimentu ekonomia inclusive ba nasaun nia dezenvolvimentu sustentavel.

Desde 2017, Knua benefisia ona kuaze joven hamutuk 5,000 (cinco mil), hudi sira ne’e 25 (vinte cinco) mak agora emprendedor, 30 (trinta) mak serbisu ona, no sira seluk iha idea negosiu no aumenta ona sira nia konesimentu liu-husi atividade oioin.

“Ami espera katak inisiativa ne’e bele haluan ka haboot atu fornese oportunidade no servisu ba joven sira iha municipiu sira atu sai transformador no kriador-serbisu. UNDP laos donor, maibe ami iha aspeitu barak ne’ebe bele oferese inklui rede peritu nasional no internasional no konseitu no pratika diak sira ne’ebe bele replica hanesan Knua Juventude Fila-Liman”, esplika Claudio

UNDP prontu atu servisu ho instituisaun Governu, parseiru dezenvolvimentu, no seitor privadu ba Timor-Leste nia dezenvolvimentu sustentavle liu-husi dezenvolvimentu no partisipasaun juventude.

UNDP Timor-Leste mos agredese ba ekipa Asia School of Business Malaysia ba sira nia ajuda hodi estabele Lab refere, ba sua Exelensia Ministra Dulce ba komitmentu hodi lansa 3D Innovation Lab, Sekertariu Estadu Juventude Desportu, Sekertariu Estadu Empregu no Treinamentu Vokasional (SEFOPE), SERVE (Institutu ba registu negosiu) IADE (Institutu Dezenvolvimentu Emprendedorismu, Telemor, no parseiru sira seluk ne’ebe hamutuk ho Knua desde 2017. * [ Zevonia Vieira | TAFARA.TL | 07.03.2019 ]

 

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Solusiona Matematika ho Aplikasaun Photomath iha Telemovel

Smartphone ka telemovel ohin loron laos deit ona nudar meius komunikasaun, maibe bele azuda ita …

Leave a Reply

Your email address will not be published. Required fields are marked *