Saturday , April 20 2019
Home / Sosial & Politika / UNTL Organiza Seminar Autismu Premeiru iha Timor-Leste
[Foto: www.zena.cz].

UNTL Organiza Seminar Autismu Premeiru iha Timor-Leste

Orador seminariu, Dr. Jorge Santos hatete Austismu laos moras. Nia  mos aprezenta kona ba Desordem Espektru Autismu no mos aprezenta kona ba aplikasaun Android ne’ebé nia dezenvolve hodi halo terapia ba labarik sira ne’ebe enfrenta Espektru Autismu.

“Autismu hanesan konjuntu karakteristika ne’ebe iha ema ida, ne’ebe la konsidera hanesan moras ida, maibe hanesan ema ne’ebe diferente tebes” Dehan Jorge Santos ba partisipante seminariu, iha salaun auditoriu UNTL, sesta feira, 25 fulan agostu 2017.

Jorge Santos mos hateten ema sira ne’ebe ho Autismu, hasoru difikuldade iha komunikasaun verbal, no iha mos balun ne’ebe la konsege bele atu hatudu sira nia sentimentu liu husi sira nia expresaun. Iha parte seluk, sira iha kapasidade no diferensa uniku tebes, no iha balun mos tamba problema ida ne’e bele konsidera sira geniu iha Matematika, Fisika, no Muzika, no sira nia diferensa principal maka sira iha  kapasidade a’as liu ema sira ne’ebe ita konsidera hanesan ema normal.

Tuir Organizasaun Mundial ba Saude, labarik 1 husi labarik normal 160 maka hetan Desordem Espektru Autismu. No iha 2014, Organizasaun Mundial ba Saude, iha dokumentasaun ne’ebe ko’alia kona ba Autismu, hasai tiha lliafuan Moras, hahu husi ne’eba Autismu la konsidera ona hanesan moras ida. Iha Autismu balun, sira sai servisu  nain profisional iha empreza balun, ezemplu iha Microsoft, iha Google, iha Yahoo, no seluk tan. Empreza bo’ot sira ne’e halo edifisiu ho kondisaun especial ida ne’ebe hakmatek atu fo servisu ba ema sira ne’ebe ho kondisaun Espektru Autismu, ba sira ne’ebe identifikadu ho Espektru Geniu tebes. Organizasaun Mundial ba Saude mos hateten iha nasaun hotu hotu, ema ho Espektru Autismu hetan tratasaun ladiak, la konta sira, diskrimina sira no viola sira nia direitu humanu no mos fatin servisu ba Autismu sira ladun Adekuadu.

“Importante liu maka halo diagnostiku sedu. Kuandu halo diagnostiku ba labarik sira sedu liu, maka diak liu atu hipotese, diak liu halo probabilidade ba ita hodi bele forma labarik Autismu sira sai jovem ne’ebe adaptadu, integradu, no iha tempu hanesan, forma sira sai jovem ne’ebe produtivu iha moris loron-loron” esplika Jorge Santos.

Jorge Santos mos hatudu ema famozu sira ne’ebe ho Desordem Espektru Autismu, sira mak hanesan ; Albert Einstein, Sir Isaac Newton, Charles Darwin, Leonardo da Vinci,  Satochi Tajiri Autor ba Pokemon iha Nintendo, no seluk tan.  Sira maka ezemplu ida husi Autismu sira ne’ebe konsidera hanesan ema jenius.

Atu resolve problema Autismu no sai oportunidade hodi forma labarik sira ho Autismu sai geniu, Jorge Santos no Cátia Raminhos halo aplikasaun jogu ida ho naran Enforcing Kids ne’ebe util iha Komputador, Tablet no mos Telemovel Android sira hodi halo terapia rasik ba Autismu sira. Informasaun kona ba Enforcing Kids rasik bele hetan iha Pagina Facebook no  Grupu Facebook ho naran hanesan, no mos iha Blogue, iha Kanal Twitter, no Kanal Youtube ho lian lima hanesan Portuges, Española, Ingles, Frances no Italianu.

Estudante UNTL ne’ebe partisipa iha seminar ne’e, Antonio Filipe, hatete katak, antes ne’e nia rona kona ba Autismu maibe nia hanoin katak ne’e moras ida. Nia hatutan dehan seminar ne’e ajuda nia komprende kona ba Autismu, nudar karakter ema ida iha ema nia moris.

Seminariu ne’ebe Jorge Santos fo mak seminariu premeiru iha Timor kona ba Autismu. Eventu ne’e hetan partisipasaun husi estudante Faculdade de Ciencias Exatas, UNTL.* [Ambrocio Colo | Editor: Ato “Lekinawa” Costa | TAFARA.TL | 25.06.2017].

About Ambrocio Colo

Ambrocio Colo, Kontributor TAFARA.TL, nudar mos Alumni Parlamentu Foinsa'e Nian [PFN] ba Periodu Daruak.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *