Vice Prezidente PSD: Hapara Lia Fuan dehan Joven Mak “Kriminozu”

PSD karik hetan fiar husi Povu, PSD fiar sei halakon naran ida joven mak kriminozu no joven mak violentu no sei tau osan ba programa joven sira hodi hamenus dezempregu iha ita nia rai TL.

Segundu Prezidente Vitor Alves, hateten Partidu Sosial Demokratiku, se tau programa ba joven sira hodi hapara lia fuan dehan joven mak kriminozu, joven mak violentu. Lia fuan ne’e hato’o bainhira halo kampanna politiku iha kampu Kulau Becora loron 19/07, ba jornalista sira.

 “Kestaun importante ba hau mak joven, tanba ema dehan joven deskriminizadu. Partidu PSD ho programa ba juventude. Hau ema veteranus ida, hau nian halo tia ona no hau dada ona bandeira no agora tusan ba hau mak jerasaun foun sira,  ema dehan joven deskriminizadu ida ne’e mak hau la aseita, hau hakarak dudu sira la’o ba oin”, dehan Vitor.

Segundu Prezidente ne’e informa liutan katak, agora tempu to’o ona loke odamatan ba jerasaun foun, sira direitu governu tenki fo fiar sira, óinsa mak intrega poder ne’e ba joven  sira.

Komunidade Kulau Antonio Vian, bainhria asisti kampanna politiku partidu PSD, ba jornalista TAFARA.TL, Vian hateten, “hau orgullu tebes rona PSD nia programa, dehan joven laos ema kriminozu ne’e loos, dala barak joven sira hetan influensia liu husi nain ulun sira, hodi provoka situasaun”.

“se hau hanesan joven Partidu, se de’it mak tur iha ne’ebá tenki tau matan ba joven sira, kampo de traballu la iha ba ami. Ami husu ba governu foun tenke tau matan ba ami joven sira”,  dehan Vian.

Nune’e mos Juventude Suku Bekora Gil Pereira, iha entervista afirma katak wainhira partidu ne’ebe kaer ukun tenke kria fatin servisu ba joventude atu nune’e labele kria konflitu.

“Hanesan joven husu ba ida ne’ebe mak kaer ukun, atu kria fatin servisu ruma iha nasaun ida ne’e iha suku ba aldeia, tenke tau netik servisu ruma ba joven sira, atu nune’e joven labele kria problema, nu’udar joven ami husu mak ida ne’e deit”,  tenik Gill.

Joven Bekora ne’e mos reafirma katak, oras ne’e joven barak mak seidauk tuur hakmatek iha nia fatin, tanba kampu servisu menus, rekomenda ba governu foun mai ne’ebe sei lidera husi kualker partidu se deit, tenke tau prioridade ba joventude iha Timor laran tomak, atu nune’e evita joven labele kria konflitu.

Joven lubuk ida iha esperansa boot ba partidu sira ne’ebe sei manan iha elisuan parlamentar, sira hotu espera votus ne’ebe sira fo sei ha valor boot, no tane as nafatin povu nian aspirasaun durante ne’e.*[Luis Soares | TAFARA.TL | Editor: Zevonia Vieira | 19.07.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.