Violensia Domestika Iha RAEOA Labele Kontinua Mosu, PR: Rejiaun Ne’e Hahu Nakloke Ba Mundu

“Povu Oé-Cusse tomak, atu kolabora ho Autoridade RAEOA/ZEESM atu hadi’ak kualidade rekursus umanus; ba 30% feton-mane sira otas 15 to’o 49 la hatene le no hakerek, badinas estuda ba, atu labele hela ba kotuk”. Lú Olo

Prezidente da Republika, Dr. Francisco Guterres Lú Olo, partisipa iha loron aniversariu Região Administrativa Especial de Oé-Cusse Ambeno [RAEOA] no Zona Espesial Ekonomia Sosial Merkadu [ZEESM].

Liu hosi deskursu Prezidente da Republika hateten katak RAEOA/ZEESM hari’i ho misaun atu oferese ba nasaun tomak, ba área espesiál ne’ebé sustentável, bele sustenta-an rasik no funsiona di’ak iha kontestu ekonomia sosiál merkadu, ne’ebe hari’i ho rekursus umanus ne’ebé di’ak no ho kualidade, atu sustenta kresimentu nasionál.

Hasai Oé-Cusse hosi kondisaun raiketan ezije aten-barani no kbiit, hodi hakat ba oin, iha dalan foun ida. Iha kontestu ida ne’e ita presiza iha lideransa ida ho matenek no hanoin luan.

“Modelo dezenvolvimentu ida ne’e hatuur iha ekonomia sosial merkadu loke dalan ba sidadaun sira nia partisipasaun no fo fatin ba sidadaun sira liberta sira nia enerjia. Sidadaun sira nuudar Ema hanesan ajente kultura nian ka produtor kultura. Modelo dezenvolvimentu ida ne’e fo dalan ba sidadaun sira hodi liberta sira nia kbiit kreativu hodi haburas sira nia cultura”, hateten Lú Olo, 18/06.

Prezidente da Repúblika mos louva komportamentus hosi parte traballadór no agrikultór kiik sira ne’ebé kolabora iha obras, balun ramata ona no balun sei la’o hela.

Prezidente-Repúblika nota katak sei iha traballadór ne’ebé kontinua hala’o servisu iha trotoar maski oras liu ona no rai hahú kalan ona. Traballadór sira seluk hader sedu tuir oras ne’ebé determina ona, tamba sira hakarak ramata servisu, hanesan ejemplu Klínika Saúde furak tebes. Ema balun husu tamba sá mak imi mai servisu sedu deit? Sira hatan nune’e, tamba obras hirak ne’e sei hela iha Oé-Cusse no sei fó benefísiu mai ami ne’ebé moris no hela iha rai ida ne’e.

“Vizaun no misaun ida ne’e hahú hatudu ona ninia rezultadu mak ita haree daudaun ho matan rasik. No husi ne’e, ita sei hamosu instrumentu-sira, investimentus no polítikas ne’ebé nesesáriu atu bele fahe modelu ne’e iha Timor-Leste laran tomak atu hasai munisípiu-sira hosi enklavidade”, hateten Lú Olo.

Xefe Estadu liu hosi nia deskursu mos hatoo katak, Wainhira hahú hari’i RAEOA/ZEESM iha tinan lima liu bá, retratu ne’ebé haree liu hosi estatística hatudu katak 61% uma-ka’in-sira iha Oé-Cusse moris iha liña pobreza nasionál nia okos iha tempu ne’ebá.

Persentajem ida ne’e aas liu kompara ho média nasionál 41%. Prezidente da Repúblika fiar katak situasaun ida ne’e muda daudaun ona no ita hein rezultadu hosi estudu foun, kona-bá situasaun moris uma-ka’in iha tinan rua ka tolu nia laran.

Iha tempu ne’ebá, retratu ki’ak ne’e mós manifesta iha labarik-sira ho otas tinan lima mai kraik ne’ebé mate aas liu iha Timor-Leste tomak, 76 hosi rihun ida. Anemia iha kosok-oan sira ho otas fulan 5 to’o 9 mós 41%, aas liu média nasionál mak 40%. Prezidente-Repúblika fiar katak situasaun ida ne’e hahú muda daudaun ona.

Prezidente da Repúblika apela, atu violénsia doméstika ba feto-sira labele kontinua iha Oé-Cusse. Liuliu iha rejiaun ida ne’ebé hahú nakloke ba mundu no ema barak liu mak sarani Katóliku. Tenke buka hadomi no respeitu malu.

Lú Olo mos apela ba Povu Oé-Cusse tomak, atu kolabora ho Autoridade RAEOA/ZEESM atu hadi’ak kualidade rekursus umanus; ba 30% feton-mane sira otas 15 to’o 49 la hatene le no hakerek, badinas estuda ba, atu labele hela ba kotuk. Ami sira ne’ebé sakrifika ami-nia juventude no hela iha ailaran durante tinan 24 tamba luta ba libertasaun nasionál, no sira ne’ebé hala’o moris iha clandestinidade, ohin barak tuir kursu oioin no barak mak hasai ona lisensiatura no mestradu. * [ Zevonia Vieira | TAFARA.TL | 18.06.2019 ]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.