Friday , September 21 2018
Home / Sosial & Politika / Virgilio: Independensia Redasaun Sai Lalenok, Atu Bele Hatene Halo Servisu Ho Profesional
Prezidente KI, Virgilio Guterres, Pe.Bento Baros no Moderador Alberico da Costa iha seminar kona ba Hametin Independensia Redasaun. [Foto: Zevonia Vieira | 16.02.2018]

Virgilio: Independensia Redasaun Sai Lalenok, Atu Bele Hatene Halo Servisu Ho Profesional

Konselho Imprensa realiza seminariu ho tema, “Hametin Independensia Redasaun iha Ambiente Politika Hasoru Eleisaun”. Iha abertura , Prezidente Konselho Imprensa [KI], Virgillio da Silva Guterres, hametin independensia redasaun, no kontinua hakas an hodi hadia servisu iha sala redasaun, hodi hasai informasaun ne’ebe independensia no los ba publiku.

“Importante liu agora ita tama iha situasaun extraordinariu, hodi fo hanoin ba malu, liu-liu ba media, hodi buka lolos informasaun hodi publika ho independensia redasaun. Liga ho eleisaun antesipada fo spasu justu partidu ka bloku sira ne’ebe sei partisipa iha eleisaun antesipada”, hateten Virgilio Guterres

Eis Vice Prezidente Asosiasaun Jornalista Timor Lorosa’e mos fo hanoin katak dever ida ne’ebe jornalista sira tenke halo ho lolos, atu publiku bele fiar ba informasaun ne’ebe fo sai. Mundu jurnalismu identika ho lia fuan “materai ka pranko” ne’e katak tenke independensia. Independensia ne’e mak sai lalenok atu bele hatene katak iha halo servisu professional, “jurnalismu ne’e atividade ida ne’ebe, ita halao ho regras no kodigu etika rasik. Sala redasaun lao ho nia padraun rasik, maske administrativamente nia hola parte iha kompania ka orgaun komunikasaun social, maibe iha servisu jurnalismu nian, iha editorial no tenke hamrik mesak. Se mak determina independensia no poder mak xefe redasaun, tanba ne’e mak iha nasaun ida ne’e servisu jurnalismu ne’e sai hanesan kuatru poder, maibe iha Timor-Leste ne’e iha orgaun soberania haat, ho nune’e media tama iha kintu poder”.

Virgillio afirma katak komponente importante mak informative no edukativu, liu-liu ba iha kobertura eleisaun nian.

Iha fatin hanesan, orador Diretor Radio Timor Kmanek, Pe.Bento Baro Pereira ne’ebe aprezenta konaba independensia politika redasaun, hare hosi aspetu etika no filosofia politika iha situasaun politika Timor-Leste nian.

Pe.Bento hateten mundu komunikasaun indetiku ho mundu jurnalismu, mundu politiku ho governu ka estadu, no mundu social identiku ho ema ka sidadaun Timorense.

“Ita tenke kaer metin ita nia knaar katak servi povu ho nasaun nia interese, profesionalmente no prinsipiu koalia lia los iha dalan liberdade no independente. Politika redasaun ida nian, la depende deit ba ema ida, maibe depende ba komponente importante. Depende ba media nain, xefe redasaun, fontes no mos depende ba jornalista sira. Tenke kesi tuir prinsipiu deontolojiku [knaar no responsabilidade] no etika jornalista sira nian”, esplika Pe.Bento

Pe.Bento afirma katak jornalista diak mak jornalista ida ne’ebe preserva ninia autonomia intelektual, ne’ebe haburas iha nin-an, hadomi knaar no hakarak atu halo didiak knaar.

Liu hosi seminar ne’ebe halao iha Fundasaun Oriente, 16/02 ne’e partisipa hosi jornalista, xefe redasaun no editor sira ne’ebe mai hosi media elektronika no print, Konselho Imprensa fo hanoin fila fali 10 elementu jurnalismu tuir Bill Kovach katak knaar importante ba pratika jurnalismu katak tenke publika informasaun ne’ebe los, loyalidade importante jornalista ba komunidade, laos ba kompania ne’ebe nia servisu katak jornalista tenke depende ba interese publiku, ensensia journalism mak halo verifikasaun, tenke independen, tenke observa ema ne’ebe iha poder, sai ponte ka nanal ba grupu vulneravel no marginal, jurnalismu sai fatin ba forum publiku, tenke sai proporsional no komprehensivu. *[Zevonia Vieira | TAFARA.TL | 16.02.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi …

Leave a Reply

Your email address will not be published. Required fields are marked *