Monday , June 17 2019
Home / Sosial & Politika / Virgilio: Prezidente RTTL Tenke Orienta Asesor Sira Atu Labele Interven Iha Sala Redasaun
Prezidente Konselho Imprensa, hamutuk ho Konselhor Jose Ximenes, Francisco Belo, Diretora Ana Sequera iha konferensia imprensa ho jornalista sira. [Foto: Copyrigt Media KI | 01.02.2019]

Virgilio: Prezidente RTTL Tenke Orienta Asesor Sira Atu Labele Interven Iha Sala Redasaun

“Ami husu ba Prezidente RTTL atu fo orientasaun ba asesor sira, atu hatene sira nia servisu ne’e iha ne’ebe. Asesor no Prezidente Konselho da Administrasaun nian servisu maka iha area administrasaun laos iha sala redasaun”. Prezidente KI

Instabilidade politika rai laran ne’ebe lao ona kuaze tinan rua nia laran, afeita makaas ba prosesu dezenvolvimentu pais nian iha seitor hotu. Liu hosi konferensia imprensa, Prezidente Konselho Imprensa, Virgilio Guteres ba jornalista sira hateten Konselho Imprensa preokupa makaas konaba situasuan liberdade imprensa.

Konselho Imprensa identifika direitamente no mos simu keixa hosi maluk jornalista sira no rona organizasaun professional sira nia preokupasaun, liu-liu ba asumtu intervensaun politika no ekonomika iha sala redasaun RTTL no desizaun atu hamosu mudansa iha orgaun informative estadu nian ka publiku nian iha RTTL.

“Konselho Imprensa akompanha katak iha RTTL hafoin iha mudansa ba lideransa iha Konselho Administrasaun nian intervensaun ba sala redasaun makaas tebes, tanba ida ne’e KI preokupa tanba intervensaun ne’e laos deit intervensaun politika maibe iha intervensaun fizika katak iha asesor balun ba too iha sala redasaun atu muda pakote reportazen ne’ebe jornalista sira prepara ona atu fo sai, lolos Xefe Redasaun mak atu fo nia desizaun atu fo sai ka lae, maibe asesor mak tun ba redasaun hodi halo desizaun no hasai tiha nutisia balun ne’ebe tuir asesor nian katak ne’e la diak”, hateten Virgilio Guteres.

Ba jornalista sira Konselho Imprensa hakarak ezije ba Sekretariu Estadu Komunikasaun Sosial atu halo medidas administrativas tanba hahalok hanesan intoleravel bainhira koalia konaba liberdade imprensa.

“Ami husu ba Prezidente RTTL atu fo orientasaun ba asesor sira, atu hatene sira nia servisu ne’e iha ne’ebe. Asesor no Prezidente Konselho da Administrasaun nian servisu maka iha area administrasaun laos iha sala redasaun, tanba iha sala redasaun dirijentu numeru un atu foti responsabiliza kontiudu hotu iha sala redasaun mak Xefe Redasaun, laiha tan ema seluk. Tanba Lei Komunikasaun Sosial mos hateten katak responsavel masimu ba kontiudu jornalistiku media nian mak xefe redasaun ou director informasaun, kuandu nutisia ne’e iha problema no ema lori ba tribunal, ema la bolu Prezidente Konselho Administrasaun RTTL maibe ema bolu diretora informasaun ka xefe redasaun mak ba hatan iha tribunal. Tanba ne’e husu ba Prezidente RTTL atu orienta nia asesor sira atu la halo intervensaun iha sala redasaun”, deklara Prezidente KI 01/02.

Ho preokupasuan hosi Konselho Imprensa liga ho intervensaun politika iha sala redasaun RTTL, TAFARA.TL halo konfirmasaun ho Prezidente Konselho Administrasaun RTTL, Francisco Gari. PIha entrevista ne’e Francisco Gari esplika katak simu ona notifkasaun hosi Konselho Imprensa konaba publikasaun nutisia

“Ami simu preokupasaun sira nian katak iha influensia, ida ne’e hanesan kritika ida mai RTTL, atu bele hadia ami nia an, tanba ami foin mai servisu semana rua resin no atu hare kritika ka input hosi parte KI nian ne’e importante tebes, atu hare servisu jornalista nian”, hateten Gari.

Hatan ba perguntas hosi TAFARA.TL katak durante asesor sira halo intervensaun iha sala redasaun hodi hare kontitudu nutisia sira, maske tuir lolos Xefe Redasaun mak iha kompetensia masimu iha sala redasaun.

Francisco Gari hatan katak depois hetan notifikasaun halo kedas enkontru internal ho asesor sira, atu husik jornalista sira halo sira nian servisu hanesan babain atu garante sira nia independensia ne’e.

Francisco Gari mos rekonyese katak Konstituisaun RDTL rasik garante liberdade imprensa no espresaun, fiar katak Timor-Leste kaer nafatin liberdade imprensa ne’ebe iha no rekonese falansu balun mosu no koko para atu hadia.

“Ita sedauk iha rejime ditadura iha ne’e, so presiza komunikasaun ne’e diak hosi parte hotu liu hosi Konselho Imprensa nian, ne’ebe halo monitorizaun no analiza ba media sira laos deit ba RTTL maibe media sira seluk”, konfesa Francisco Gari. * [ Zevonia Vieira | TAFARA.TL | 01.02.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *