Monday , June 17 2019
Home / Sosial & Politika / Virgilio: Xefe Gabinete Laos Polisia Investigasaun Kriminal, Hodi Halo Inkeritu Ba Jornalista Sira
Prezidente Konselho Imprensa, Virgilio Guterres halo konferensia imprensa ho jornalista sira. [Foto: Copyrigt Media KI | 01.02.2019]

Virgilio: Xefe Gabinete Laos Polisia Investigasaun Kriminal, Hodi Halo Inkeritu Ba Jornalista Sira

“SEKOMS tenke iha oin atu defende independensia editorial no independensia servisu nian, ministeriu ne’e mak tenke hamrik iha oin atu defende instituisaun ne’ebe sira estabelese”. Prezidente KI

Relasiona ho jornalista Radio Televisaun [RTTL] Constancio Vieira ne’ebe hetan ameasa hosi Xefe Gabinete Sekretariu Estadu Komunikasaun Sosial [SEKOMS] Julio Gonsalve liu hosi telefone, liu hosi konferensia imprensa Prezidente Konselho Imprensa, Virgilio Guterres ba jornalista hateten hahalok iresponsabilidade ne’ebe mai hosi Xefe Gabinete SEKOMS, Julio Gonsalves ne’ebe ameasa jornalista Constacio Vieira atu hasai nia hosi RTTL E.P nudar jornalista.

“Sekretaria Estadu Komunikasaun Sosial ne’ebe mosu atu inisia kuadru legal ba orgaun sira ne’ebe importante ba liberdade imprensa nian. SEKOMS tenke iha oin atu defende independensia editorial no independensia servisu nian, ministeriu ne’e mak tenke hamrik iha oin atu defende instituisaun ne’ebe sira estabelese, akontese katak ofisial publiku iha SEKOMS telefone direita no fo ameasa ba jornalista, tanba deit jornalista nia hakerek no opiniaun iha media sosial, ami simu keixa ne’e hosi Constancio Vieira. Ba KI ne’e buat foun hafoin 18 anos hosi tinan 2000 bainhira Indonesia husik hela ita”, hateten Virgilio 01/02.

Koselho Imprensa kondena makaas hahalok sira ne’e. Husu ba superior iha instituisaun relevante atu halo samada de atensaun , laos ba ofisial publiku deit maibe ba se deit iha governu nia laran.

“Kuandu jornalista ka media sira publika buat ne’e la los ka la tuir superior sira hakarak, sira iha direitu de resposta. Funsiona ema sira ne’ebe governu kontrata atu sai public relation, Sira nia servisu mak atu kontra informasaun sira ne’ebe la los konaba ministeriu, laos uza telefone hodi ameasa jornalista sira no laos bolu jornalista ba iha SEKOMS atu halo inkeritu, tanba Xefe Gabinete laos polisia investigasaun criminal nian atu halo enkeritu ba jornalista sira”, esplika Virgilio

Tuir Konselho Imprensa katak aktu ka hahalok ameasa hosi Xefe Gabinete SEKOMS nudar hahalok arogante no diskriminativu ne’ebe la kontribui ba prosesu hametin demokrasia liberdade imprensa no liberdade espresaun iha pais demokratiku ida ne’e.

Bazea ba situasuan ida ne’e liu hosi konferensia imprensa, Konselho Imprensa ezije no husu ba Sekretariu Estadu Komunikasaun Sosial, Mericio Juvenal dos Reis Akarak atu fo samada atensaun ba Xefe Gabinete SEKOMS tanba nia attitude la apoiu dezenvolvimentu no liberdade imprensa no espresaun iha Timor-Leste.

Relasiona ho jornalista RTTL Constancio Vieira ne’ebe hetan ameasa hosi Xefe Gabinete SEKOMS, TAFARA.TL halo konfirmasaun ho Prezidente Konselho Administrasaun RTTL, Francisco Gari.

Ba TAFARA.TL Francisco Gari hatan katak tuir informasaun ne’ebe rona katak Xefe Gabinete ho jornalista ne’e konnese malu diak no nudar vizinhu, tan ne’e mak sira halo komunikasaun ba malu, “hau la dun hatene ameasa oinsa. Ita iha orgaun Konselho Imprensa, sekarik buat ruma akontese, sira sei nafatin fo alarme ba instituisaun hotu iha Timor atu garante liberdade imprensa”, hateten Gari.

Jornalista RTTL Constancio Vieira hetan telefone direita no ameasa via telefone iha loron 11/01, bainhira nia publika nia status konaba ezenorasaun Prezidente RTTL sesante Naldo Rei. * [ Zevonia Vieira | TAFARA.TL | 01.02.2019 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *