Workshop Planu Estratejiku Centro Juventude Maliana, Zeferino: Joven Tenke Iha Vizaun

“Husu imi atu ativu, kontribui hanoin, tanbá ita tenke iha vizaun, iha planu ne’ebé diak, hodi kontribui ba dezenvolvimentu juventude iha ita nia munisipiu rasik,” tenik Presidente Autoridade Munisisipu Bobonaro Zeferino dos Santos.

Mensajen neé hatoó hosi Presidente Autoridade Munisipal wainhira halo abertura ba Workshop Planu Estratejiku ba Centro Juventude Maliana, Segunda-feira (24/06/2019), semana hirak liu ba. Liu hosi eventu refere Prezidente Autoriedade neé mos hatoo ba foinsa’e sira ne’ebe partisipa, katak foinsa’e sira deve ser ativu, kontribui hanoin, tanba joven tenke iha vizaun, iha planu ne’ebe diak, hodi kontribui ba dezenvolvimentu juventude iha Munisipiu Bobonaro rasik.

Zeferino afirma katak Timor-Leste iha ona Politika Nasional Juventude, planu estratejiku 2011-2030, ne’ebe nudar matadalan ba Governu, liu-liu Sekretaria Estadu Juventude no Desportu hodi dezenvolve area juventude iha Timor-Leste, nune’e elobarasaun planu estratejiku ne’e nudar oportunidade diak ba foinsa’e sira, hodi defini planu longu prazu, mediu no kurtu prazu.

Entretantu iha fatin hanesan, Chefe Departamentu Fortalesimentu Organizasaun Juventude, Diresaun Nasional Juventude, Sekretaria Estadu Juventude Desportu afirma, Jacinto Antonio Ximenes informa katak iha tinan 2019 Governu aloka orsamentu USD 1,543, 346.00 ba dezenvolvimentu area juventude iha Timor-Leste. Nune’e presija organizasaun juventude sira nia apoiu hodi implementa programas atividades nesesarias ba dezenvolvimentu juventude Timor-Leste.

“Hanesan ita hotu hatene, funsaun planu ne’e mak atu defini destinasaun organizasaun nian, no jere rekursu ne’ebé mak iha ho efisiente no efikas. Tanba ne’e mak Centro Juventude konvida ita boot sira mai atu tur hamutuk hodi halo planu estratejia ba juventude durante tinan lima. Mai ita hamutuk, fo hanoin ba malu hodi deside Centro nia futuru,” dehan Jacinto Antonio Ximenes.

Workshop elaborasaun planu estratejiku ne’e relaiza iha edifisiu Centro Juventude Maliana durante loron lima, hahu dia 24 ate 28 Junho 2019, ho partisipante hamutuk nain 26, kompostu husi feto 9, mane 17, mai husi suku mak pertense iha Postu Administrativu Maliana, Konselu Juventude Postu neen, UNETIL Maliana, Joven ba Kristu Maliana, no grupu arte Maliana.

Orsamentu ba atividade ne’e hamutuk USD 2,975.00, apoiu husi Sekretaria Estadu Juventude Desportu. Workshop elaborasaun planu estratejiku ne’ebe hodi elabora planu estratejiku ba Centru Juventude Maliana durante tinan lima, periodu 2020-2024.* [Martinho Moniz | Editor: Zevonia Vieira | TAFARA.TL | 24.06.2019].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.