Wednesday , October 24 2018
Home / Sosial & Politika / Xanana: Governu Tau Ona Planu Hodi Sosa Asoens Hosi ConocoPhilips Iha Tinan Oin
Kay Rala Xanana Gusmao.[Foto: Zinho MD | TAFARA.TL].

Xanana: Governu Tau Ona Planu Hodi Sosa Asoens Hosi ConocoPhilips Iha Tinan Oin

“Governu sei tau iha orsamentu ba tinan tuir mai, ita hein katak Prezidente promulga, aban ita haruka kedas osan ba”. Xanana Gusmao

Xefe Negosiador Prinsipal, Kay Rala Xanana Gusmao to’o ona iha Dili, ho aviaun Sri Wijaya iha tuku 12.30 oras Timor-Leste. Komunidade sira iha Dili laran, hamutuk ho membru governu no membru parlamentu hosi bankada governu nian, simu Xanana Gusmao ho seremonia tradisional.

Liu hosi konferensia imprensa iha sede CNRT, bairo central Dili, hatan ba perguntas hosi TAFARA.TL konaba prosesu sosa asoens [saham. Red] 30% bainhira mak sei sosa?

Xanana responde katak klaru ona dehan atu sosa, governu sei tau iha orsamentu ba tinan tuir mai, “ita hein katak Prezidente promulga, aban ita haruka kedas osan ba” dehan Xanana Gusmao, iha sede CNRT 08/10.

Iha konferensia imprensa refere Xanana Gusmao mos konfesa katak, “ita hein tinan 16, ho ida ne’e maka ita atu hare katak povu ida ne’e hatene hein, povu ne’ebe iha esperansa nafatin. Iha 2002 ita konvida Australia atu tur, hodi koalia fali fronteira, la fo ulun no lakohi tur to’o tinan 16 tiha mak ita foin bele hetan ita nia fronteira hosi sira”.

Eiz Primeiru Ministru ne’e mos salient katak tamba sa mak ita hakarak fronteira maritime uluk? Tamba fronteira maritma mak difini, saida mak ita nian no saida mak ema nian.

“Iha loron 28 Septembru ita asina tamba Greater Sunrise nian join venture [sosiu asoens] iha kompania haat mak hanesan Woodside iha 42%, Conocophilips 30%, Shell 27%, Osaka Gas 8%. Ida ne’ebe defende makas atu lori ba Darwin-Australia maka ConocoPhilips, tamba fasilidades Bayundang iha Darwin ne’e ninian tamba ne’e mak nia hakarak, tamba neíe maka ita sosa nia asoens 350 milloens”, esplika Xanana.

Iha parte seluk Notisia jornal online Forbes [1 Outubru 2018] hateten katak Governo Timor-Leste iha expetativa kampu mina no gas sei tulun dudu makas liutan dezenvolvimentu iha Tasi Mane. Maibe dezenvolvimentu Sunrise iha Timor-Leste iha hela espekulasaun nian laran no ne’e sei lao iha dekada ida nia laran, karik akontese duni. ConocoPhillips hatete katak akordu ba faan asoens partisipasaun 30% ne’e sei kompleta iha 2019.

Hosi parte ONG Lao Hamutuk, publika tiha ona sira nia relatoriu ida (iha 4 Outubru 2018) ne’ebe hatudu sira nia preokupasaun kona ba kustu, riskus no impaktu sosial hosi prezensa kadoras iha parte Timor-Leste nian.

“Nasaun presiza no merese hetan analiza detallu, no loloos, ho informasaun publiku kona ba kustu, benefisiu no riskus hosi projetu Greater Sunrise no Tasi Mane nian, molok uza povo nia osan bilaun doalres hodi selu kompania mina, kontraktor sira, individu sira, kompania sira seluk ne’ebe laiha kompromisiu naruk ba nasaun ka obrigasaun atu serve interese publiku”, tuir NGO Lao Hamutuk nia esplikasaun

Lao Hamutuk mos hatete katak, “Timor-Leste sei selu tokon $350 ba ConocoPhillips iha inisiu tinan oin nudar kustu avansu no obrigasaun finanseiru ba kustu osan ne’ebe boot liu iha futuru. Tokon $350 ne’e osan ida mak dala rua boot liu osan ne’ebe tau ona ba edukasaun labarik sira nian iha Timor-Leste. Karik osan tokon $350 ne’e sei sai nudar parte ida hosi Orsamentu Jeral Estadu ba 2019 nian.”

Lao Hamutuk nia relatorio mos nota katak, ba Greater Sunrise, asuntu sira relasiona ho finansiamentu, ekonomia, meioambiente no konsequensia sosial sira sei fo efeitu ba povo nia moris hosi jerasaun ba jerasaun, no sira nia konsequensia bo’ot liu duke emosaun patriotiku temporariu deit. *[ HENRIQUE S. DE JESUS | Editor: Zevonia Vieira | TAFARA.TL | 08.10.2018 ]

About Henrique Soares de Jesus

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

One comment

  1. (1) Parabens ba MBKRXG ho equipa tomak nebe serbisu makaas hodi marka ita nia prezensa no nudar nain mos ba konsorsiu Greatest Sunrise. (2) Ita hotu konsiente katak la iha reseitas ka rendimentu ruma sem investimentu. (3) Nunee mos la iha modelu investimentu ka business ruma mak sem riskus. Tanba nee mak, ba oin presiza halo jestaun ba risku – bai-bain iha estratejia oin 4 hodi hatan ba riskus – ho didiak para la hamosu impaktu ho konsekuensias negativas mak bot. Hodi nunee, (4) Hanoin kritiku mak akresenta hosi NGO Lao Hamutuk nudar Early Warning System ba Jestores Estadu hodi jere jestaun ba investimentu ho didiak no lolos.

Leave a Reply

Your email address will not be published. Required fields are marked *