Friday , September 21 2018
Home / Sosial & Politika / Xanana Husu PR Hato’o Rekoñesimentu ba Advogadu no Apoiante Sira
Xefe Negosiador Kay Rala Xanana Gusmao iha konferensia imprensa, hafoin fila hias hosi tasi-balun mai Timor-Leste. [Foto: Martinho Moniz | TAFARA.TL].

Xanana Husu PR Hato’o Rekoñesimentu ba Advogadu no Apoiante Sira

“Hau husu ona ba Prezidente Republika atu fo rekoñesimentu ba advogadu bobot deit ne’ebe iha, ba hirak ne’ebe apoiu hela ita, ba maluk sira seluk ne’ebe servisu hela iha liur ne’eba. Hau ba marka prezensa deit, hanesan dudu, fo korajen, ita sei funu kontinua nafatin, labele husik ema hadau husi ita nia liman rikusoin ne’e.”

Deklarasaun ne’e hato’o hosi Kay Rala Xanana Gusmão, Xefe Negosiador ba solusaun disputa fronteira maritima entre Timor-Leste ho Australia, ba jornalista sira, iha konferensia imprensa mak halao iha Sede Partidu CNRT, Dili, hafoin fila hi’as hosi tasi-balun, iha loron Domingo (11/03/2018).

Povu tomak tomak preokupa Xanana nia viazen, loron 9 fulan Marsu tinan ida ne’e, Xanana halo fulan neen hela iha rai liur, hamutuk ho ekipa negosiador fronteira maritima Timor-Leste ho Australia. Xanana konsiente katak fulan neen haree husi rotasaun tempu kleur tebes, maibe Xanana preokupa durante tinan 16 ona, Povu Timor-Leste hafoin hari-an nu’udar estadu direitu demokratiku hein no buka atu hetan fronteira ho Australia, hodi konkista independensia total no kompleitu.

Ohin, Xanana to’o iha Dili. Povu tomak, labarik, jovens, ferik no katus, husi instituisaun oi-oin hamrik iha estrada ninin, haklalak hodi fo agradese, honra ba Kay Rala Xanana Gusmão nu’udar Xefe Negosiador, maibe, Xanana rekoñese katak nia papel iha prosesu ida ne’e ki’ik, nia husu ba povu tomak atu hato’o agradese ba advogadu sira, ekipa tomak ne’ebe defende Timor-Oan nia direitu soberania fronteira maritima.

“Ohin labarik sira, inan ho aman sira iha luron ne’ebá, hakilar fo obrigadu, mas hau tenki dehan katak hau nia papel iha prosesu ne’e ki’ik oan, ita tenki agradese liu mak ita nia advogadu sira, ho ekipa tomak ne’ebé ba defende ita nia direitu ne’e,” esklarese Xanana.

Xanana kontente tebes tanba ema barak hasoru malu ho nia hodi hato’o obrigadu. Xanana mos haktuir katak nia parte la’o tuir nafatin ain fatin sira uluk nian. Xanana kumpri deit nia dever hodi dudu prosesu refere.

Lina fronteira maritima Timor-Leste ho Australia define lolos ona iha loron 6 fulan Marsu tinan 2018. Eis Komandante em Xefe das FALINTIL ne’e konsidera nu’udar vitóri ki’ik ida. Xanana hateten funu seidauk hotu, tanba ne’e povu tomak labele rende luta ba nafatin hodi hetan nia rikusoin.

Eis Primeiru Ministru ne’e hatutan, nia parte rona katak iha fatin hotu-hotu halo misa, veteranus sira mobiliza-an, partidu sira mos mobiliza-an, sarani sira, nu’udar ema, ita halo sala barak, dala ruma ita hanoin katak ita ba misa, husu ba Maromak nia tulun, Maromak fo kedas, lae! Maromak sei hare ba ita nia esforsu, ba ita nia kbit, la fasil ba ita hotu.

Nune’e Xanana Afirma, “funu seidauk hotu, fronteira iha tia ona, maibe funu seidauk hotu. Ita tenki kaer metin ita nia rikusoin, ida ne’e mak ita liu tiha ona vitoria ki’ik ida.”

Maske nune’e lider rezistensia ne’e fiar katak povu tomak, li-liu fiar ba Maromak bo’ot iha leten as ba, sei fo tulun ba ita, fiar mos ba matebian sira, rai lulik, fatuk lulik.

Aman rezistensia ne’e hat’o agradese tebes ba Igreja nia atensaun iha minutu ikus ninian, husu ba parte hotu-hotu atu reza nafatin, labele rende, luta nafatin hanesan uluk iha tempu rezistensia hodi hetan ita nia rikusoin.* [Martinho Moniz | TAFARA.TL | Editor: Metodio Caetano Moniz | 11.03.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi …

Leave a Reply

Your email address will not be published. Required fields are marked *