Wednesday , October 24 2018
Home / Sosial & Politika / Yasinta: Feto Nafatin Sai Objetu Iha Kobertura, Akara: Media Presiza Iha Prespektiva Igualdade Jeneru
jornalista sira hasai foto hamutuk ho Secretario Estado Comunicaçao Sosial, Merisio Akara, Direitor MOFFE, Diretor CAUCUS, Chief Technical Advisor Electoral Project-LEARN UNDP Timor-Leste. [Foto: Zevonia Vieira | 25.09.2018]

Yasinta: Feto Nafatin Sai Objetu Iha Kobertura, Akara: Media Presiza Iha Prespektiva Igualdade Jeneru

“Bainhira media balun hakerek artigu, feto sei sai nafatin objetu, ho nune’e media tenke iha sensibilidade jeneru.” Yasinta Lujina

Papel media importante hodi promove asumtu feto iha sosiadade, liu hosi komprensaun konaba jurnalismu sensitivu jeneru, bele promove asumtu jeneru iha estadu demokratiku.

Fundasaun CAUCUS no Movimentu Feto Foin Sae Timor-Leste [MOFFE], realiza treinamentu ba jornalista sira ne’ebe haknaar an iha media nasional, onaba promove jurnalismu sensitive jeneru.

Diretora MOFFE, Yasinta Lujina iha abertura hateten papel media importante tebes atu halo kobertura konaba papel feto iha sosiadade. Tuir Yasinta katak observasaun ne’ebe organizasaun feto halo hatudu katak, dalabarak kobertura fo spasu liu ba mane sira mak hatoo sira nia deklarasaun ka hanoin.

“Liu hosi prosesu treinamentu ida ne’e, hakarak enkoraja media no jornalista sira atu hakerek asumtu feto, hodi promove perfil feto maluk sira, saida mak feto maluk sira halo ona, sira nia kontribuisaun ba rai ida ne’e mos importante atu tane as. Media presiza foka asumtu feto, hodi nune’e bele motiva feto maluk sira seluk, atu iha espritu hodi kontribui ba estadu ida ne’e, liu hosi sira nia kapasidade ne’ebe sira iha”, hateten Yasinta iha salau treinamentu Tower Fatuhada Dili, 25/09.

Ativista feto ne’ebe durante ne’e ativu, hodi hakilar konaba igualdade jeneru ba partisipante sira hateten, bainhira media balun hakerek artigu, feto sei sai nafatin objetu, ho nune’e media tenke iha sensibilidade jeneru.

Iha fatin hanesan Secretário Estado Comunicação Sosiak, Merisio Akara ba jornalista sira ne’ebe tuir formasaun, katak media no jornalisra sira tenke tau atensaun makaas iha seitor igualdade generu.

Tuir Akara katak iha Timor-Leste adopta sistema patriakal, presiza dezafia konseitu balun hanesan kultura patriakal ne’ebe hahu hosi uma laran, iha komunidade no ikus to iha estadu.

“Laos fasil ita atu husik, maibe presiza tempu atu hadia. Konstrusaun sosial ne’e mak hanorin ita desde kiik, ita hare hosi prespektiva ida ne’e, mane ho feto hanesan iha komarka laran. Iha komarka feto nian espasu kiik liu, bainhira kompara ho komarka mane nian. Hare hosi konseitu ida ne’e, parte rua ne’e tenke liberta nia an hotu. Hare hosi parte ida ne’e feto ho mane tenke servisu hamutuk, hodi muda mentalidade, liga ho violensia domestika no violensia bazea ba jeneru”, hateten Merisio Akara.

Secretario Estadu mos hatoo pontus importante katak media sai ajente edukador ida ba publiku, atu partisipa iha eduaksaun sivika. media presiza iha prespeketiva konaba igualdade jeneru, ita tenke rekonnese ita nia media balun sei iha frakeza. Media balun sei hakerek no iha tendensia halo feto sai objetu. Media balun sei deskreve feto la hatene halo buat ida ka seidauk bele kompete ho mane sira, media balun seidauk iha komitmentu oinsa halo kontinuasaun hodi hakerek issue jeneru, media balun halo nutisia konaba asumtu feto sedauk luan, no la dun iha atensaun makaas.

Ho obstaklu ne’ebe media no jornalista sira sei hasoru, Secretãriu Estadu, Merisio Akara iha komitmentu katak media ba oin tenke hadia, tenke hare asumtu legal iha nivel nasional no internasional. Media tenke iha konnesementu ba deklarasaun Universal Direitus Humanus, Deklarasaun Beijing, CEDAW, Konstituisaun RDTL, Lei Violensia Domestika.

“Deklarasaun sira ne’e eduka ita atu lao tuir, hanesan sidadaun no estadu tenke hatene saida mak ita tenke kumpri no lao tuir. Iha nivel nasional ita iha ona kuadrumentu legal balun. gGvernu iha komitmentu atu asegura Lei sira ne’e, para ema hotu bele kumpri no governu mos tenke hare hosi aspetu ordem, se ema la kumpri tenke fo sansaun”, deklara Akara.

Formasaun ba jornalsta sira ne’e organiza hosi CAUCUS no MOFFE, hetan apoio finanseiru hosi governu Korea no Japao, liu Hosi UNDP Timor-Leste. Treinamentu refere halao durante loron tolu, ne’ebe partisipa hosi media elektronika no imprimi. * [ Zevonia Vieira | TAFARA.TL | 25.09.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *